E aña aki, pa 2024 un biaha mas Comision Celebracion Dianan Nacional (CCDN), Departamento di Cultura Aruba (DCA) hunto cu Comision Arte di Palabra y Fundacion Corector di Papiamento, a organisa e prestigioso competencia pa nombra e Poeta di Patria 2024, cual ta un iniciativa di Sr. Atan Lee den feliz memoria.

E diesun edicion di Poeta di Patria a conta cu 20 participante ken a presenta nan obranan na Museo Historico Aruba (Fort Zoutman) un biaha mas despues cu a bay na Cas Cultura pa un par di aña.

Tambe a conta cu e presencia di minister di Cultura Xiomara Maduro ken a señala cu e evento aki ta uno unda e poetanan ta declama nan amor pa Aruba cu sentimento y esey ta sigur algo cu ta yena tur hende cu orguyo pa motibo cu “Aruba ta orguyo di nos tur.”

Minister Maduro a splica cu Poeta di patria a cuminsa cu un iniciativa pa celebra identidad cultural y promove e talento literario di e pueblo, e prome anochi di e competencia di Poeta di patria a tuma luga 14 di maart 2014 na Fort Zoutman mes marcando asina un comienso di un tradicion cu a ricibi un gran acogida y cu a celebra cu entusiasmo durante añanan cu a sigui.

“Esaki ta un muestra di e compromiso di nos tur pa asina e ora ey a traves di poesia promove e arte, nos idioma papiamento y literatura,” el a comenta.

E competencia aki no solamente ta fortifica e aspectonan di nos identidad y cultura, e ta enrikece y e ta diversifica e paisahe literario cultural di comunidad contribuyendo na un profundo sentimento di ta pertenece y tin e orguyo nacional, “un poesia ta inspira nos pensamentonan, ta alimenta nos alma cu emocionnan y ta cultiva nos imaginacion,” el a expresa.

Durante e dies ultimo aña aki, Poeta di Patria a brinda un plataforma unda talento local a briya y unda e cultura tambe a briya, cada poema ta representa un pida di e alma colectivo, un aspecto di e patria y Aruba su identidad, ta un celebracion unda idioma Papiamento, herencia cultural y creatividad di e talentonan local.

Cada escritor a entrega un (1) obra, e poema mester tabata na idioma Papiamento y por tabatin entre 4 cu 9 strofa; cada strofa mester tabatin 4 frase y por a rima.

Jhon Freddy Tobon Montoya a bira e ganado absoluto di e competencia aki cu e poema “Ki Bal,” conhuntamente cu otro 4 participante mas.