(Reuters) – Den e dos aña prome cu e guera na Ucrania, un Boeing 737 vincula na oligarca Ruso, Vladimir Yevtushenkov a bula rond mundo, pasando door di Riviera Frances, Maldives y Seychelles hunto cu capitalnan mundial y centronan financiero. E aña aki, na lugar di e preferidonan di esnan mas afluente, e jet a bishita estadonan ex-Sovietico manera Kyrgyzstan, Kazakhstan y Belarus algun biaha, como tambe China, segun data di vuelo compila pa Flightradar24 ta mustra.

Den un muestra di tanto e limitacionnan y alcance di sancionnan occidental na lugar desde invasion di Moscu na Ucrania, algun di esnan mas rico y poderoso ta hayando manera pa tene nan jetnan personal den aire, segun reportahenan di Reuters ta mustra, pero e restriccionnan a limita fuertemente unda e avionnan por biaha.

E Boeing vincula na Yevrushenkov tabata entre al menos 50 jet priva – algun registra na Aruba – cu a re-registra bao bandera Ruso desde e invasion na februari 2022, segun data anteriormente no reporta di registro nacional di avion te cu comienso di augustus.

Varios di e avionnan repatria tabata asocia cu politiconan prominente y figuranan di negoshi, segun dos fuente senior den industria di aviacion Ruso, kende no tabata autorisa pa papia cu medionan di comunicacion y a papia den condicion di anonimato. E dos fuente a bisa cu Yevtushenkov personalmente a usa e Boeing-737, cu te cu aña pasa tabata carga e logo di e compania cu el a funda, e conglomerado AFK Sistema, segun potret riba e website Jetphotos ta mustra.

Yevtushenkov a bisa cu e no lo responde na pregunta tocante e avion, incluyendo si e ta us’e.

Yevtushenkov formalmente a entrega control di Sistema despues cu Reino Uni a impone sancionnan riba su persona aña pasa. E ta keda como accionista principal di e grupo.

Autoridad di aviacion Ruso, Rosaviatsiya, y ministerio di Transporte no a responde na solicitud pa comentario. No tin sugerencia cu companianan asocia cu e avionnan a viola of evadi ningun sancion cu repatriacion of vuelonan andando.

Algun avion ta para

Hurisdiccionnan incluyendo Aruba y Isle of Man, unda algun di e jetnan tabata registra anteriormente, ta observa e sancionnan occidental. Esey a hacie dificil pa haya seguro, fuel y permiso pa avionnan propiedad Ruso bula bao nan bandera, segun un di e fuentenan.

Poniendo e avionnan bao bandera Ruso ta permiti nan pa bula for y na nacionnan cu no a impone un prohibicion riba vuelo, of unda biaheronan individual no ta sanciona, incluyendo Turkia y Dubai.

A pesar di maniobranan asina, mas cu mita di e avionnan priva y corporativo Ruso, un flota di alrededor di 400, ta keda para den exterior of a ser bende, segun e mesun fuente a calcula, basa riba su conocemento extenso di e sector.
E cantidad total di avion di negoshi bao bandera Ruso awo ta 145, un aumento riba e 97 cu tabatin comienso di maart 2022, segun e lista.

Pa motibo di e sancionnan, avionnan Ruso ta prohibi di drenta e 27 nacion di Union Europeo, unda oligarcanan Ruso anteriormente tabata bula frecuentemente pa negoshi y placer, y unda hopi jet priva vincula na nan tabata registra prome cu e guera.

Ambos fuente di aviacion, cu ta organisa y maneha jetnan di negoshi, a bisa cu algun doño di jet ta bulando for di Rusia na Turkia, of estadonan ex-Sovietico, y despues ta charter avionnan diferente na aeropuertonan di UE, tanten cu e individuonan no ta bao sancion personal.

Ehempel di e practica aki ta sucede al menos un biaha pa siman, segun un di e fuentenan.

Segun datonan di aduana, algun di e avionnan repatria ta vincula na empresa y lidernan comercial cu a sostene presidente Ruso, Vladimir Putin den e guera na Ucrania of cu ta asocia cu e presidente. Esaki ta inclui un Bombardier Challenger 650 cu e data ta mustra tabata importa pa Uralkali, un productor mayor di fertilisante anteriormente propiedad di Dmitry Mazepin – entre e magnatenan cu a atende un reunion di empresarionan lider dirigi pa Putin anteriormente e aña aki.

Un Bombardier Global 6000 a ser importa pa VEB.RF, un banco di desaroyo estatal lidera pa Igor Shuvalov, un ex-vice-prome minister. VEB, Uralkali y Mazepin no a contesta na solicitud pa comentario riba e registracion di e jetnan na Rusia.

Datonan di aduana ta mustra cu mayoria di avion priva repatria despues di inicio di e guera a bolbe Rusia for di paisnan ex-Sovietico como tambe for di UAE y Turkia.

Manera ta e caso di e Boeing vincula na Yevtushenkov, e otro avionnan re-registra a evita di crusa den espacio aereo di UE y a keda na paisnan considera amigo di Rusia, segun data di Flightradar24 t mustra.

Bandera di Aruba

Na december 2021, e saca potret di e Boeing riba e tarmac na Praga, mustrando e registracion cu bandera di Aruba P4-AFK, segun un potret riba Jetphotos ta mustra. E avion tabatin strepi shinishi y e logo di Sistema riba su tail. Tiki mas cu un aña despues, despues cu e guera a cuminsa, e avion a aparece na Bishkek, Kyrgyzstan, segun un potret riba Jetphotos. E number riba su tail a cambia pa e registracion Ruso, RA-73890 y a kita e logo di Sistema. Pero e cobertura di motor ainda tabata carga e identificacion P4-AFK y e strepinan shinishi tabat’ey ainda.

Sistema a nenga di duna comentario riba e avion of su doño. Merca a agrega Sistema na su lista di sancion dia 2 di november. Entre comienso di 2020 y e invasion di Ucrania, cual oficialnan Ruso a yama un “operacion militar special”, P4-AFK a haci varios biahe na Alemania, Luxembourg, Suisa y Maldives, y un biaha na Croacia, Republica Checo y Seychlles, segun datonan di Flightradar24.

Tambe a biaha 105 biaha na Rusia, 17 na Francia, 8 na Italia, Emirato Arabe Uni y Latvia, cinco na Reino Uni y cuatro na Turkia.

Despues cu e invasion a cuminsa, e avion a bula entre aeropuertonan na Turkia, UAE, Oman y Kazakhstan pa e resto di 2022, nunca mas crusando den teritorio di UE. A haci apenas 14 biahe durante e periodo aki.

Segun registro di avion Ruso, publica riba Rosaviatsiya su website na augustus, a registra e avion bao bandera Ruso fin di december. Data di aduana ta mustra cu a importa e avion oficialmente na Rusia dia 30 di december for di Bishkek, capital di ex-miembro Sovietico, Kyrgyzstan, pa despues su vuelonan ta limita en gran parti na Rusia.

Te awo na 2023, a bula 47 biaha dentro di Rusia y nuebe biaha combina na Kazakhstan, Kyrgyzstan, Belarus y China.

Potret di BBC.