Metodo Montessori ta un metodo di enseñansa caracterisa pa ofrece un ambiente prepara, por ehempel, trankil, ordena, simpel, real, den cual cada elemento tin su rason di ta den e desaroyo di e muchanan. Asina ta duna nan oportunidadnan pa compromete cu un trabou interesante, of cu mester di un periodo di concentracion cu no mester ta interumpi.

Durante un entrevista cu Bon Dia Aruba a tene cu Jessica Piña, director di Nos Fortalesa Montessori Aruba, el a splica cu metodo Montessori tin 100 aña di existencia y nan ta sigui e filosofia di Dr. Maria Montessori, kende tabata un señora cu ideanan y visionnan vanguardista y cu nan ta sinti privilegia pa ta parti di e comunidad mundial aki.

Su soño pa habri un Montessori Basisschool na Aruba a cuminsa na fin 2011, Nos Fortalesa Montessori Aruba a wordo funda dia 18 Februari 2013, pero te na Augustus 2014 a logra cuminsa cu 13 mucha entre e edad di 6-8. Piña a manifesta: “E metodo Montessori ta uno unico y e parti mas importante ta cu den Montessori e mucha ta central”.

Tambe el a sigura cu nan fortalesa sigur ta cu nan ta un scol Montessori, cu cada mucha tin su mesun plan personalisa, nan ta ofrece materialnan diseña door di Montessori hunto cu algun colega psicologo y psikiatra. E materialnan aki ta ‘hands on’ cu ta involucra tur e sentidonan di e muchanan, asina aki nan por siña miho, desaroya concentracion, orden, secuencia, cuido di naturalesa, materialnan, propio etc.

E lesnan ta na Ingles y Hulandes y tin biaha si ta necesario na Papiamento y Spaño. El a bisa cu nan tin e luho pa por sinta cu mayornan pa wak kico nan deseo ta pa futuro, kico e muchanan su habilidad y debilidad ta pa asina personalisa mas posibel e mucha su plan.

Di otro banda, Piña a manifesta cu e debilidad mas grandi ta cu mayoria di hende na Aruba no ta compronde e sistema aki ainda. Aunke e interes y comunidad Montessori ta creciendo na Aruba, ainda nan como ‘Defensornan Montessori’ tin un trabou grandi pa educa e comunidad di Aruba tocante e filosofia. Alabes nan mester structura e sistema aki na Aruba den un forma cu por tin cooperacion, no solamente cu scolnan secundario, pero tambe cu otro scolnan primario publico.

Jessica Piña, director di scol Nos Fortalesa Montessori Aruba, a expresa cu ta pasa hopi cu scolnan Montessori rond di mundo, cu poco poco ta bira un scol ‘tradicional’ pa via di presion di mayornan, sociedad y gobierno cu no a wordo educa riba di e filosofia Montessori. Ta importante pa un scol primario di e tipo aki tin un balans entre Montessori, tecnologia y ‘liñanan di enseñansa – standard benchmarks’ y mas importante ainda, ta cu e mucha ta siña den un ambiente cu ta su estimulo, unda cu e ta ‘namora di siña’ sin sinti mucho presion y sin sinti cu e no ta ‘suficientemente bon’.

Nos fortalesa Montessori ta traha cu grupo di 25 mucha aproximadamente cu dos full-time reparti den tres grupo: edad di 3 pa 6 aña, di 6 pa 9 aña y di 9 pa 12 aña.

Di mesun manera, Piña a comenta cu comunidad mester ta consciente cu mundo ta cambia semper y nos tin cu cambia cune. Algo cu Maria Montessori semper a enfoca riba dje ta:  ‘Follow the Child’, esaki no kier men laga e mucha haci locual e kier ki ora e kier, esaki kier men ta pa para keto un rato pa scucha y observa locual e muchanan mester na cada etapa di nan desaroyo.

Ademas, Piña a señala cu tur hende tin cu acepta cu no tur mucha ta desaroya mescos, no ta tur tin mesun habilidad ni interes, pero tur ta mes importante. Mas trempan ta cuminsa educa y yuda transforma e muchanan, miho e futuro ta mustra. Ofrece pa nan tur cu por awo ora nan ta mucha, pa nan por yega na nan potencial total ora nan bira adulto.

Nos Fortalesa Montessori Aruba ta un scol chikito y ta yena hopi lihe, Piña como director ta recomenda pa esunnan cu tin interes di inscribi nan yiu den e luga aki, pa no tarda mas cu e luna di februari of maart. Tambe el a sigura cu nan no ta tuma muchanan di 8 aña bay ariba. E mayornan por haya un afspraak via e-mail y despues di reuni cu mayornan y/of a ricibi e formulario yena, nan ta invita e mucha pa pasa un mainta cu nan. Despues di esey nan ta sinta cu mayornan atrobe, pa wak si di berdad e scol ta un bon fit pa nan yiu. El a specifica cu nan no ta un scol special, pero si nos por yuda muchanan cu no ta pas niun otro caminda na Aruba, si nos tin e habilidad.

“Semper keda corda cu enseñansa, disciplina y educacion ta responsabilidad di nos tur, di mayornan, di scol y comunidad y claro tambe, manera nan por compronde, e muchanan mes tambe”, el a finalisa.