Jess Wolff ta un artista Arubano multifacetico y excepcional. Su punto di bista unico ta distinguible den su arte, cual tin un caracter mas experimental. Den un entrevista cu Bon Dia Aruba, Jess a conta un poco tocante su arte, su filosofia personal, y su tayernan actual na Aruba.

Despues di a bay biba na Hulanda poco tempo atras, Jess a bolbe Aruba pa haci un par di tayer di cosemento, cual ta un di su formanan faborito pa expresa su mes. “Di siete aña mi a cuminsa siña cose na scol. Mi ta corda cu un di mi cosnan faborito di scol tabata cosemento, pasobra nos tabata hay’e como handvaardigheid. Esey mi ta corda cu tabata e actividad mas leuk cu mi tabata gusta den creatividad, pasobra nos no tabata haya hopi cos,” Jess ta conta. E muchanan muhe tabata traha cosemento, y e muchanan homber handenarbeid. “Mi ta corda mi tabata hopi bon den dje, y mi tabata echt disfruta. Mi tabata sa tecnicanan caba for di chikito.”

Jess ta conta cu despues di tempo, e no a practica mucho cu nan. E tabata gusta cosemento si, por ehemplo, durante su adolescencia e tabata cose of altera su propio paña “pa mi ta diferente.” Durante e tempo aki e tabata experimenta cu diferente tecnica di cosemento enfoca riba paña.

Den ultimo dies aña despues cu el a bolbe for di Hulanda, el a profundisa mas den e diferente tecnicanan di cosemento. Asina el a haya oportunidad pa duna les di cosemento na muchanan di scol. “Nan a bin cu un programa cu hopi scol na Fort Zoutman, nan tabata invita dos of tres biaha pa siman den un luna di tempo, cu yen klas tabata bin pa les di weaving. E ora mi a duna e les di weaving como un tayer.” Y maske muchanan di awendia ta hopi mas druk den nan mente y no ta sinta keto ta concentra manera antes, e tayernan aki tabatin un reaccion inespera cerca e muchanan. “Tur mucha mester a participa, y no un par so, y bo ta haya cu un par cu si lo ta [interesa] y un par cu no ta. Pero asina mes, sorprendentemente el a bay hopi bon, pasobra e atencion di e muchanan tabata bay profundo den e trabao. E tabata hopi interesante pa mira con e muchanan ta bin masha druk mes, yen desordo, y despues di un rato cu nan ta bezig tur hende ta keto keto.”

Y maske practica di weaving – y cosemento en general – por bira algo pa relaha, Jess ta bisa cu na comienso e ta algo dificil. “Mi ta ripara cu por haya stress of incomodidad na comienso, pasobra e ta test bo pasenshi. Dus loke bo mester sa for di comienso ta cu esey bo mester keda corda bo mes, cu bo mester laga los na tempo y pura. Unabes cu bo mes slow down y bo cuminsa den un ritmo cu bo mes por controla – of e mes ta controla bo, mi no sa – e ora bo ta cuminsa haya placer di dje. E ta bira adictivo. For di eynan no tin buelta atras.” Jess ta splica cu na comienso e por ta dificil, pero na final bo ta bay disfruta. “E ta siña bo pa calma bo mes. Y esey ta e parti cu ta bon pa bo salud mental, pasobra nos ta den un rush constantemente. Di ora bo lanta bo mente ta cuminsa bay. Den esaki, ta mescos ora bo bay meditacion, cu bo mester stop tur cos, bo mester calma bo curpa, bo curason, tur cos mester slow down pa bo ta den e momento presente.”

Jess ta un artista hopi individual, unda su perspectiva unico ta facil pa reconoce, ya cu e ta decididamente su mes. Jess ta bisa cu a traves di tayernan e tambe ta busca pa yuda otronan encontra nan individualidad y autenticidad. “Ta hopi importante pa cada hende tin nan mesun manera pa expresa nan mes den loke nan ta crea.” E ta ofrece guia, ya cu na comienso no semper ta facil pa “laga los”. Jess a pasa den esey tempo cu e tabata den academia di arte, unda tabata dificil pa djis crea libremente, liber di expectativa di otronan y di bo mesun husgamento. “Door di laga los, bo ta crea intuitivamente. Esey ta algo cu mi ta guia den e les. Experimentacion y intuicion ta hopi importante pa crea bo mesun estilo. Mi ta haya experimentacion hopi importante, esey mi ta haci hopi den mi trabaonan y esey mi ta purba di siña otro.”

Diasabra proximo, dia 1 di april, y e siguiente diasabra dia 8 di april, Jess ta organisando tayer di cosemento pa crea un popchi den forma di un pushi. “Mi tabata pensa algo cu mi por siña e hende den e cuatro ora di e workshop. Pero tambe mi kier a comparti algo cu ami mes ta crea, pero cu hende por crea den nan mesun manera, djis dunando nan e base di e forma.” Jess ta bisa cu esey ta hacie hopi curioso, ya cu durante su les e tambe ta siña di su participantenan. “Mi ta sinti cu na e momentonan aki mi tambe ta hopi curioso di e animal – pushi. Pushi ta magico, nan ta bestia hopi misterioso, curioso, aventurero. Nan tin hopi elemento di personalidad cu mi ta sinti ta e escogencia corecto, cu tur loke nan ta representa. Bo ta comparti tur e energia aki door di cre’e.”

Durante e tayernan ta bay traha un popchi for di comienso. “Nan ta bay haya un pida tela, un patronchi pa marca y detayenan pa e wowo, etc. hangua y hilo y por scoge nan color. Mi a bin cu tela di Hulanda specialmente pa e les, e ta un bon calidad di tela, mi ta orguyoso cu mi por haci uso di esey. E resto di detayenan nan mes por agrega pa duna nan mesun estilo.” Jess ta bay siña e participantenan con pa haci stitches, y no mester tin ningun conocemento previo. Dia 1 di april ta pa edad di 18 aña bay ariba, y dia 8 di april ta pa edad 15+. Pa participa den e tayer por tuma contacto cu Jess riba rednan social, su identidad artistico ta Luna and the Wolff, of via e-mail jesskwolff@gmail.com.

Algun tempo atras, Jess a bay biba na Hulanda pa un tempo, y awo e ta bishita Aruba back. E ta conta cu e cambio di ambiente a yud’e sinti renoba despues di a sinti exhausto. “Bay Hulanda a yuda definitivamente pa mi por a haya e gana. Aruba ta keda super importante pa mi, y mi kier keda bin pa comparti mi conocemento y claro pa siña. Mi gusta mondi, mi gusta explora mata y ta sin fin pa mi keda siña di Aruba. Pero toch pa mi trabao e ta un lugar hopi chikito. Dus mi ta prefera, mientras tanto cu mi por, bay [Hulanda] y bin. E cambio di ambiente ta yuda pa keda den motivacion y pa keda siña cos nobo.”