Jerry Harris lo permanece cera te cu e bay huicio pa su caso di pornografia infantil.
Un hues federal a rechasa e libertad bao fiansa pa e strea di e serie documental popular di Netflix, ‘Cheer’. Manera Bon Dia Aruba a yega di reporta, Harris tabatin un audiencia di fiansa siman pasa na Texas, unda e hues a scucha argumentonan na fabor y contra dun’e su libertad prome cu su huicio. E hues finalmente a duna un veredicto diabierna, di acuerdo cu e deseonan di fiscal pa tene cera.
Fiscalnan ta bisa cu nan ta kere cu Harris lo ataca menornan di edad si e haya libertad bao fiansa. Nan a bisa cu e tin varios victima menor di edad caba, y probablemente lo bay back na e mesun patronchi di comportamento di cual e ta sospechoso. Autoridadnan federal ta bisa cu ela sigui busca menornan di edad maske el a wordo informa di e investigacion federal.
E hues a cita e acusacion aki den veredicto diabierna, bisando cu Harris tabata consistente den su buskeda di e supuesto victimanan y a demostra comportamento fuera di su control.
Team di defensa di Harris a bisa corte cu e no lo presenta un menasa of haci daño na hende si e keda libera bao fiansa pendiente su huicio, pasobra e no lo tin acceso na internet, y lo tin checkeonan regular cu un psikiatra. E hues no a cambia su opinion y a bisa cu sosten di comunidad y falta di un historia criminal no ta suficiente pa proba cu Harris no ta presenta un menasa pa comunidad.
Na luga di esey, e hues a bisa cu un falta di historia criminal en berdad ta demostra con facil ta pa e sorto di comportamento aki keda sin wordo detecta.
Ademas di e cargonan federal, dos di e supuesto victiminan di Harris a demand’e.
