(AP) – Despues di un relacion cu a dura mas di 2 decada, dos compromiso y 2 matrimonio, Jennifer Lopez a pidi divorcio for di Ben Affleck.
E peticion diamars na Los Angeles a trece un fin aparente na e pareha famoso, of por lo menos e di dos edicion, cu a capta e atencion di e cultura pop y a cubri tur portada di revista den su tempo. E pareha a keda conoci, prome cu e moda di duna parehanan famoso un nomber, como “Bennifer.”
Recordnan di corte ta mustra cu Lopez a entrega e peticion diamars na Los Angeles Superior Court. E noticia a keda reporta prome pa TMZ. TMZ a sigui informa cu Lopez a nombra e fecha di separacion como april 26 di 2024, pero no a menciona ningun acuerdo prome cu e matrimonio.
Despues a conoce otro, enamora y compromete den comienso di ananan 2000, y actua hunto den “Gigli” y “Jersey Girl”, e pareha a separa, parcialmente a causa di e wowo publico y e presion di esaki.
Sinembargo na deleite di algun y critica di otronan, e pareha a reuni dos decada despues y a casa dos biaha den ana 2022. “Amor ta bunita. Amor ta bondadoso. Y aparentemente, amor tin pasenshi. E tin un pasenshi di 20 aña,” Lopez a skirbi anunciando nan prome boda na Las Vegas, firmando e publicacion como Jennifer Lynn Affleck.
E pareha a biaha pa Las Vegas unda nan a casa na White Wedding Chapel, yamando esaki e anochi mas feliz di e pareha su bida.
Ambos di nan tabata casa anteriormente, Affleck di 52 aña cu Jennifer Garner, cu ken e tin 3 yiu y a divorcia den 2018.
Lopez, di 55 aña, a casa 3 biaha prome. E tabata brevemente casa cu Ojani Noa for di 1997 pa 1998 y na Cris Judd for di 2001 pa 2003. Despues el a casa cu cantante Marc Anthony pa un decada, casando den 2004 y tin twin di 14 aña. El a cuminsa un relacion cu Aex Rodriguez sinembargo e pareha a caba nan compromiso na 2021.
