Jennifer ta candidata di un certamen di beyesa mescos cu Miss Aruba pero cu na e momentonan aki ta trata di algo diferente y cu lo tuma luga di manera online debi na e pandemia Covid-19 cu e obhetivo di busca e beyesa Arubiano pa representa Aruba den Miss & Mrs Top of the World.

Den oportunidad aki, Bon Dia Aruba a tuma contacto cu Jennifer Lopez Hernandez  studiante pa bira trahado social y cu ta candidata number ocho cu e categoria Miss Voluptuous Aruba plus size di 24 pa 26 aña, tocante e certamen el a expresa cu tur siman nan tin diferente reto pa haci y segun e na november lo saca e ganado di cada categoria y despues nan lo competi cu otro paisnan pero di manera online.

Asina mes, el a conta con el a logra participa cu ayudo di un amiga di dje y cu ademas na principio el a bisa “NO” pa via cu e ta sinti su mes timido pa participa den actividadnan asina, cu esaki dirigi pa mucha muhenan flaco, cu mester tin fondonan y tempo suficiente pa inverti pa lo cual el a sigura cu e tin un yiu chikito cu mester di dje.

Despues di un tempo cu su amiga a keda insisti, el a inscribi den e certamen cu ta conforma di 12 participante na unda nan mes ta graba nan actividadnan cu nan telefon of saca potret pa por realisa nan retonan semanal di “un manera simpel pero alabes mester cumpli cu reglanan di e certamen”, Herrera a sigura.

Tocante su expectativanan, el a señala cu for di comienso e no tabata kere den esaki pero aworaki cu el a drenta y ta participa den dje e ta wak como “algo hopi nice” pa motibo cu normalmente e hende ta custuma di wak e mucha muhe cu size regular so y no tin nada pa plus size, den su caso e semper a modela pa plus size y ta algo cu e ta gusta pero door cu no tabata existi un certamen di e tipo aki e no por a participa.

Manera el a menciona cu ta un persona timido, el a afirma cu esaki ta net bon pe pa motibo cu no mester ta cu publico, “tur hende ta wak’e riba rednan social y esey ta un experiencia nobo, ademas cu ta algo internacional na unda mi ta entusiasma pa gana e corona”, Herrera a declara.

Tambe el a trece dilanti cu esaki ta representa un reto pe, pa motibo cu door cu e ta timido y tin cu sali y graba videonan na luganan publico esey ta algo dificil “pasobra tur hende ta wak bo”.

Ademas, el a conta cu semper e tabata modelo di plus size pa tiendanan di pañanan pero despues cu el a haya su yiu el a stop completamente te ultimo dianan aki cu el a bay bek den modelahe.

Den mundo, hende ta custuma caba di mira ya sea na TV, publicidad of prensa modelonan di size regular cu tin un estilo di bida saludabel y na unda nan mester tin movecion pa mantene nan curpa den un peso adecua, tocante esaki Herrera a expresa cu e certamen tin diferente categoria, regular y plus ademas di diferente edad, tur e participante a haya sponsor di un gym durante e seis siman cu e competencia ta dura y igual cu otro modelo nan tambe mester move, consumi cuminda pa mantene of pa baha di peso.

“A pesar cu bo ta diki of flaco bo tin cu traha riba e condicion”, Herrera a afirma.

Di mesun manera, el a bisa cu esaki por influencia hopi e hendenan den tur sentido, e personanan por sali di nan zona di comfort y haci algun cosnan nobo, kibra barera di ta timido, mas habri pa haci otro cosnan y involucra su mes cu otro hende.

“Na Aruba e size no ta importante, tur ta ok y por participa den algo asina si bo ta gusta” el a expresa.

Pa finalisa, el a laga como mensahe pa comunidad apoya e candidata di cada categoria cu a pesar di e situacion di aworaki nan ta haci nan best, cu amor, dedicacion y cu tur di nan ta encurasha pa bay dilanti y participa.