Segun sra. Arends-Reyes tin e impresion cu di berdad Enseñansa ta bou atake y ta keda haya hopi sla for di gobierno di MEP POR RED. Gobierno ta anuncia un cambio despues ta suspende y bisa tur cos a keda mescos, pero na final toch ta introduci e cambio.
Un ehempel bibo ta ora cu a anuncia cu lo bay corta gasto drastico pa Enseñansa y cueste loke cueste ta bay corta den overuur di maestronan. Minister a duna instruccion per direct den un carta manera aña escolar a habri cu lo corta riba 15 miyon den salario di maestronan na overuur of taakuur, despues Minister a sali afo y bisa cu no lo hasi’e y tur cos ta cana normal. Scol a habri na augustus y ya pa e payroll di september despues di e manifestacion di maestronan, casualidad of no, maestronan na Aruba a haya un sla grandi y a nota cu tur falta sumanan cu ta varia entre 80 fls te sumanan cu ta yega 1200,- cu a conta riba dj’e cu ya a trah’e caba na augustus. A bisa den media cu lo ta fout di Financiën pa cu e NPR e nieuwe pensioen regeling cu ta e sumanan cu por yega te fls.100,- cu falta. Tambe tin maestronan cu a haya via email cu nan lo wordo paga retroactivo locual nan falta te na fin di october pa motibo cu Minister a cambia su maneho di overuur y taakuur Y nan lo ta bezig cune. E sumanan mas grandi tin di haber cu of overuur of toelagenan riba nan salario cu nan no a ricibi tambe lo no perde.
Despues di algun siman a sali den media cu tur maestro lo ser paga locual nan falta, tur maestro a keda den tension door cu un suma di mil florin of mas no ta wega y nan tambe tin nan responsabilidadnan financiero pa cumpli cune. Esunnan cu tabata falta e suma di NPR cu no ta pasa 100,- a haya nan cen laat, esunnan cu a cobra salario basico tin algun cu a haya locual nan tabata falta y tin algun maestro cu ainda awe no a ricibi ningun cen extra pa motibo cu despues cu scol a cuminsa, despues cu tabata tin un acuerdo cu nan cabesante y a traha e over uur y taak uren, nan ta tende cu e ‘spelregels’ a wordo ahusta toch. Nan no lo haya e taakuur of overuur nan ey mas paga pa motibo cu e stichting ta pidi pa bezuinig. Tur e cambionan aki y tardansa a pasa sin cu nan a ricibi un specificacion detaya di e suma cu nan a haya bek si nan a haya algo bek. Maestronan a cobra sin haya un salaris slip digitalmente of hard copy manera custumber. E pregunta e ora ey ta keda dikon maestronan ta wordo trata asina na Aruba? Dicon ta net maestronan mester ta e dupe di tanto decisionnan desbentahoso. Di mes cu tin un scarcedad enorme na maestro na Aruba, si nan bay manifesta nan ta wordo lastra den media cu nomber pa politiconan cu ta sostene gobierno, riba social media tur e fake accountnan liga na Ministernan y partidonan ta conoci ken ta nan tras y nan ta scoge pa intimida maestronan cu ta atende reunion prome cu a bay manifesta. Asina ki si ta dificil pa Aruba por sigui yama su mes un pais liber y democratico.
Na Aruba na e momentonan aki hasta companianan cu vocifera nan mes contra un maneho di gobierno ta wordo intimida of ta saca informacion di nan. Tur persona of grupo cu ta sinti nan mes cu nan lo kier vocifera nan opinion mester tin e espacio pa haci esaki, ta nan pleno derecho. Awor ta keda un yamado na e maestronan pa no acepta e mal trato cu net Enseñansa ta sufriendo, mientras Enseñansa no mag gasta fondo pa renoba algun scolnan cu mester un renobacion grandi, otro Ministerio si ta bayendo den procesonan pa bidding pa un centro di 80 miyon den un PPP constructie.
Mientras Enseñansa mester cremencha y maestronan ta keda haya sorpresa desagradabel, otro companianan cu gobierno ta subsidia si ta buscando mas fondo na Parlamento pa percura pa salario di trahadonan.
Maestronan den un manifestacion ultimo a pidi pa Parlamento yama un reunion publico prome cu vakantie di october y aki tambe nan no a haya oido. Scucha nan ta un y haci trabou di nan peticion ta otro. Minister tabata den exterior, a bolbe y ya practicamente vacacion escolar pa october ta bay cuminsa y nada di reunion cu nos maestronan a pidi. Ta sumamente lamentabel cu pais Aruba a yega na un punto asina cu ta corta den Enseñansa, nos futuro. Cada inversion den Enseñansa bo lo cosecha back y den caso cu ta sigui trata maestronan asina y ta corta den Enseñansa e repercusionnan di e decisionnan aki lo bin pa nos comunidad despues sra Arends-Reyes ta termina bisando
Comments are closed.