Jenifer Vargas, un productor di Audio & Video hopi conoci den e mundo di media na Aruba cu a revert na e religion di Moslim, ta bisa cu pa 40 aña caba tin un comunidad di Moslim na Aruba sin cu a causa daño na ningun hende y cu ta keto bay sconde for di discriminacion.
“Mi tin 25 aña ta biba na Aruba y prome cu mi a revert na Islam, nunca di mi bida mi no a mira un Moslim of topa cun’e riba caya. Un di e motibo nan pakico mi a revert na e religion di Islam tabata pasobra despues di a traha na radio dunando noticia tur mainta, mi semper a puntra mi mes ken ta e Moslim y pakico nan ta haci locual nan ta haci? Mi tabata sinti un disgusto tur mainta dunando noticia cu ta yena cu odio. Mi no tabata sigur si e noticia nan tabata corecto y pa motibo cu mi no tabata sa e realidad mi a prefera di no sigui cu esey y bay busca mas informacion,” Sra. Vargas a bisa.
Sra. Vargas ta splica Bon Dia cu el a sigui busca mas informacion tocante e religion Islam riba un ramo mas intelectual pa motibo cu nunca e la conoce un Moslim y tabata djis kier a sa mas pa verifica pa su mes si en berdad e religion aki ta uno asina negativo manera sa wordo describi. “Mi buskeda tabata completamente algo intelectual y mi a haya tanto informacion cu despues di tanto luna mi a ripara cu mi a namora cu Islam, mi a ripara cu esaki ta algo bunita y cu ya caba mi tabata haci cosnan den mi bida cu ta coresponde na Islam. Mi a bisa si mi mester bira Moslim e no lo cambia mi bida pasobra mi no ta bebe alcohol, mi no ta come porco , mi no ta fiesta y ya e parti ey caba mi tabata tin e den mi bida,” Sra. Vargas ta splica.
Comunidad Moslim ta sinti discriminacion na Aruba
“Mi a haci un prueba un dia, mi a bisti mi paña Hijab completo y mi a bay un luga di koffie na unda nan a literalmente laga mi 7 minuut para dilanti sin tin contacto cu mi y keda sin atende mi. Mi a sinti cu e discriminacion na Aruba ta real,” Sra.Vargas ta bisa.
Sra. Vargas ta conta Bon Dia cu un rato e la pensa cu e tabata e unico Moslim na Aruba pasobra nunca e la topa uno. El a realisa despues di a conoce diferente hende cu na Aruba tin un comunidad di Moslim pa mas cu 40 aña y eynan el a puntra su mes pakico no tin un Moskee na Aruba caminda tur Moslim por bay practica nan religion? “Mi a compronde e personalidad di Moslimnan, nan ta hende hopi pasivo. Nan ta invisibel, nan ta entre nos pa hopi aña caba y niun hende no sa di nan pasobra nan ta hende cu ta reserva pa nan mes. Kiermen bo tin cu puntra bo mes, ta berdad locual ta bisa den media? Ta berdad cu Moslimnan ta hende di conflicto cu ta mata otro?” Sra. Vargas ta bisa.
Religion Islam y grupo nan radical no ta mescos
Bon Dia Aruba a sinta combersa cu diferente miembro nan di e comunidad Moslim cu tambe ta bisa cu nan no por cana rond cu nan paña nan bisti pasobra hende ta discrimina nan di biaha y pensa of haci wega cu nan ta terorista. Un otro miembro di e comunidad Moslim cu kier keda anonimo ta conta Bon Dia cu nan kier habri un Moskee na Aruba for di basta tempo caba pero cu esaki semper tabata un situacion fastioso y nan kier evita problema pa motibo cu nan no tin nada di haber cu grupo nan radicalista cu ta crea e imagen negativo di Islam.
“Desde 1998 nos tabata tin un peticion pa un tereno pa nos por traha un Moskee na Aruba caminda nos por practica nos religion. Esaki te ainda no ta e caso pa diferente motibo pero nos ta sigui purba pasobra nos kier un luga cu nos por bini hunto, come, resa y djis tin un luga tambe caminda comunidad di Aruba mes por educa y sa mas tocante Islam pa mira cu nos no tin nada di sconde, nos ta hende normal tambe,” e meneer ta conta Bon Dia.
Comunidad Moslim ta agrega cu nan no ta culpa ningun hende cu na Aruba por tin un actitud asina contra Islam, esaki segun nan ta falta di educacion y informacion di e religion cu semper por bay busca pa haya sa mescos Sra. Vargas a haci cu a realisa cu esaki ta un religion bunita cu ta pas cu su bida y cu no tin nada di haber cu e grupo nan radical nan cu media nan internacional ta constantemente papia di dje.
