For di siman pasa un grupo grandi di fundacion a uni pa asina por brinda e servicio nobo pa esunnan di edad avansa na Aruba. E servicio ta un liña di telefon cu a habri na nivel nacional. Un grupo grandi di boluntario lo tin tarea pa ricibi e grandinan cu ta den soledad na cas.
Jeffrey Matos, manager di club Kibrahacha a bisa cu e number ta 2800505, cu persona grandi di edad por yama, un boluntario lo contesta y tin tarea pa papia cu nan. Segun Matos, e situacion actual tin un impacto grandi riba nos hendenan.
E preocupacion pa esunnan di edad avansa cu por haya nan mes den soledad a duna inicio na idea pa tin servicio pa yama, pa combersa of comparti cualkier inkietud cu nan por tin. Diasabra a cuminsa cu nan servicio oficial. Nan a haci analisis cu a haya cantidad y e promedio di esunnan cu a yama ta 65 aña pariba.
“Nos a haya cantidad di mas grandi ta 65% hende muhe. Ta kere cu e cantidad mas grandi di casonan den cual mester a tuma accion, por ehempel yuda tuma contacto cu otro instancia, tabata 46%; pa 54% no mester a tuma accion”, Matos a comparti.
E meta di esaki ta yuda y brinda e informacion na e grandinan. Pa cualkier situacion cu nan por tin por bin un solucion. Nan ta compronde cu un grupo grandi di esunnan cu ta yama ta esunnan cu ta biba nan so, y ‘esey tambe ta un preocupacion’.
Tambe a duna di conoce pa esunnan cu lo haci uso di yamada, e ta gratis. Awo nan ta conta cu 15 boluntario cu lo ta trahando riba pregunta, inkietud. “Nos tin un grupo apart di chat caminda ta comunica regularmente y tin un gana di yuda.”
E necesidad pa bin cu algo asina ta pa motibo cu siman pasa a ripara e situacion y a dicidi pa uni forsa y traha hunto, y awo ‘e entusiasmo ta grandi’. Tambe pa persona cu tin miedo pa yama, nan ta bisa cu e informacion of e yamada ta keda anonimo si e persona preferi, ‘un grupo di 14% a keda anonimo, pero otro no’.
Nan a duna informacion y comparti cu nan. Pa esunnan cu tin necesidad, nan ta yega mas facil na e otro instancia pa nan tambe por keda trankil.
A puntra si nan servicio tambe ta den caso cu hende grandi mester remedi di botica, of otro necesidad, kico ta wordo haci. Matos a splica cu nan boluntario mes ‘no ta sali riba caya’. Esey ta tereno di otro.
Nan trabou ta pa contesta telefon y ofrece e servicio. Pa sali ta keda riba e tereno di trahado social y diferente instancia. Manera e porcentahe di hende cu mester a tuma accion a tuma contacto cu nan bek for di e otro instancia.
“Tin algun di nos grandinan cu ta biba na cas of un camber patras cu e famia. Nan no ta cushina of no ta bayendo actividad social. Pa e motibo aki a bin cu e liña di telefon pa nan por tin algo cu nan por socialisa”, el a bisa. Di e forma aki, via e liña di telefon, nan por hiba un combersacion un rato pa sinti nan mes bon.
Un preocupacion cu a yega di menciona ta cu ta tene na cuenta cu tin pensionado cu no tin un carchi di banco pa lanta placa di ATM di banco. Matos ta bisa cu ta buscando contacto cu asociacion di banco pa por trece mas informacion pa aclara cu e personanan cu ta yama.
Segun Matos, otro preocupacion ta cu persona di edad ta riba rednan social y nan ta ripara cu tin diferente medio cu por bruha nan den informacion. Mirando cu ya caba tin un porcentahe cu ta insigur, tin nervio, nan tin limitacion di salud cu por preocupa nan mas ainda.
Nan ta consciente cu hende di edad nan sistema immuun ta mas debil, ‘nan ta grupo di risico’. Segun e ta bisa cu e yamada cu ta bin dilanti, cu nan ta preocupa pa nan salud, pa nan famia, e situacion ta crea panico cerca nan. Pues ta importante pa papia cu nan, asina e personanan por sali di duda.
“Nos como organisacion ta mantene medionan oficial di gobierno, DVG y otro departamento cu ta relevante pa por trankilisa e persona. E conseho ta pa persona mayor di edad por yama e number”, el a bisa.
Nan tin dos grupo di boluntario cu lo atende yamada cuminsando for di 8am te cu 12pm y e di dos grupo lo cuminsa di 4pm te cu 8pm ta orario disponibel. Ta evaluando e cantidad y esunnan cu ta dispuesto pa yuda crece y duna e servicio di yudansa. E number ta 280-0505.
