Adultonan mayor tin mester di habilidadnan nobo y Kibrahacha ta ofrece nan esey

Mester atrae generacion nobo di 60 plus. Esey ta pensamento di Director di Club Kibrahacha Jeffrey Matos na Bon Dia Aruba. Manera ta conoci Club Kibrahacha a lanta 36 aña pasa pa ofrece actividadnan na personanan di edad di pensioen kendenan diripiente a haya nan mes sin mucho contacto social, pa motibo di a stop di traha.

For di momento di su fundacion, Kibrahacha a bira un centro di encuentro, unda na comienso tabata haci hopi obra di man.

Pero cu tempo a desaroya mas actividad y a innova e forma di traha di Kibrahacha pa cumpli cu locual e clientenan cu ta bishita kier y ta gusta. E principio di encuentro cu otro ta keda mescos pero e actividadnan a amplia. “For di 2010 caba a cuminsa cu renobacion di e programa. Nos ta keda purba atrae generacionnan nobo. Y pa esey mester adapta e programa,” Matos a splica. Y pasobra tin diferente generacion di pensionado cu ta bishita Kibrahacha mester tin programa pa tur. “Nos tin hendenan di 60 plus, di 70 plus, di 80 , 90 y nos tabatin hasta hende di 100 cu tabata bishita nos Club y mester adapta e programa pa cumpli cu locual nan kier haci.”

Actividadnan educativo

Locual a ripara den ultimo añanan ta cu e generacion nobo ta exigi mas programa educativo y pa esey ta duna charlanan, ademas di training di computer y uso di internet. “Nos a bay mas den e parti educativo y informativo.” Na 2010 a haci e actividad di movecion pa hende grandi un elemento importante den e programa cu Club Kibrahacha ta ofrece y ultimo añanan, ta enfoca mas riba tecnologia.

“Nos a ripara cu e tabata un necesidad grandi h aña pasa ora cu e pandemia a cuminza y liñanan a forma na banconan,” Matos a sigui splica. “Banconan a cuminza exigi mas transaccion online, y esey a pusha nos mas den e direccion ey.” Y asina a enfoca hopi atencion na duna cursonan riba e tema di online banking hunto cu ayudo di banconan mes cu tabatin acudi na e cursonan pa guia e sesionnan. Mesun cos a conta pa personal di Setar, WEB, Elmar cu tambe a participa den e programa educativo riba e tema pa pago pa medio di digital.

Esaki ta e forma di traha di Club Kibrahacha, esta pa traha hunto cu otro instancia na interes di esnan cu ta haci uso di locual e club ta ofrece. “Y awor nos a cuminza traha cu otro organisacion riba e tema di salud. En realidad, ta den e direccion ey nos ta bayendo, pues educacion.”

Expectativa di cliente

Hopi hende cu ta acudi na Club Kibrahacha pa prome biaha ta drenta sin realmente conoce kico tur e organisacion ta haci, Matos a bisa. “Tin un drempel pa nan yega. Esey ta conta pa tur, for di 60 plus te mas grandi. Pero pa tur, e contacto social ta mas importante. E momento ey, edad no ta conta, sino pa evita cu nan ta sinti nan so.” Matos a splica cu hopi hende cu ta baha cu pensioen, awor kizas hasta cu 65, ta cay diripiente den un isolacion, un bashi.

“Despues di tanto aña ta den un organisacion of tabata activo, diripiente bo tin 65 aña y ta cay den bashi. E aspecto social como tal ta mas importante pa henter e grupo.” Como tal tin cliente cu ta acudi na Kibrahacha unicamente pa e actividadnan di movecion. Sinembargo, realidad ta cu nan ta cera contacto cu otro y e momento ey ta crea lasonan di amistad, cu ta aspectonan kizas hasta mas importante.

Miembresia

Tin entre 200 a 250 persona cu ta frecuenta Club Kibrahacha. E cantidad a cay na 200, pero awor ta creciendo, Jeffrey Matos a conta Bon Dia Aruba. Nan ta bin pa lesnan cu cuarta, guitara cu a bira asina popular cu a amplia e programa hasta riba Diasabra. “Nos tabatin 300 hende inscribi prome cu e pandemia y el a cay te na 200. Pero awor e cantidad di personanan inscribi a cuminza crece atrobe, yegando na 250 persona activo.”

Sosten di comunidad

Club Kibrahacha tin un structura special. E club a keda funda pa Rotary Club y ainda ta haya sosten financiero di e club di servicio. E structura financiero ta parti den cuater pida. Hendenan cu ta bin e Cclub ta contribui cu 20 porciento, Gobierno ta contribui entre 45 pa 50 porciento na e gastonan, Rotary Club ta sigui contribui cu 20 porciento y e resto di fondonan mester bin a base di actividadnan di recaudacion di fondo di parti di esnan encarga cu Club Kibrahacha. “E ta varia segun e cantidad di miembro y recaudacion cu nos ta haci.”

E suma cu Gobierno ta duna ta un lumpsum, cu ta bay pa cubri gran parti di e gastonan di transporte y e otro fondonan ta pa maneha y e salario di e tres trahadonan ta bin di e recaudacion di fondo.

Boluntarismo ta fuerte na Kibrahacha

“Kibrahacha ta grandi y fuerte pa motibo cu nos tin 40 boluntario. E base di Club Kibrahacha ta boluntarismo. Nos tin tres personal cu ta yuda coordina, pa traha e planificacion y mantene e infrastructura. E resto di trabou ta den man di boluntarionan, for di transporte, te actividadnan di recreacion, educacion y movecion.” Awor tin boluntarionan cu ta yuda mantene e edificio y lo tin otro cu ta bin yuda cu cierto proyectonan specifico, manera tayernan. Uno grandi na caminda ta un tayer riba October 1, cu ta Dia Internacional di Adulto Mayor, cu ta den man di boluntarionan. “Nos ta fuerte danki na e sosten di e boluntarionan, cu tambe ta haya training con ta comunica cu e grandinan. E pandemia di COVID-19 a siña nos cu comunicacion ta hopi importante y Kibrahacha na 2020 a maneha un liña di telefon pa hendenan grandi yama pa cualkier preocupacion. Y eynan nos a siña hopi con importante comunicacion ta pa hendenan grandi.”

E rol di Club Kibrahacha den e 36 añanan di existencia como tal a desaroya y amplia di un centro di encuentro pa uno cu ta monitor e necesidadnan di un grupo importante den sociedad. Y si esey ta nifica cu mester cambia protocolnan, bin cu actividadnan nobo, lo haci esey tambe. “Si nos mester modernisa, nos lo haci esey tambe.”