E refineria di Aruba lo funcciona bou guia di e Laboratorio di Energia Renobabel y Apropia di UC Berkeley cu ta dirigi pa e ganado di premio Nobel dr. Daniel Kammen. Asina Jeff Meyers, CEO di Quanten Consortium Aruba LLC a bisa Bon Dia Aruba. E direccion pa percura cu e refineria na Aruba ta opera na un forma mas sostenibel, ta pa medio di haci uzo di energianan renobabel. “Esey ta nos experticio, esta pa percura cu ta uza e fuentenan renobabel di energia pa opera e refineria na un forma mas limpi posibel. Ora cu nos a mira e proyecto, ta e ora ey nos a forma e consorcio pa asina acumula tur e experticio necesario pa reconstrui e refineria na Aruba. Parti di e mision ta pa crea un refineria cu ta mas eficiente posibel y ta uza e technologia mas moderno, cu ta permiti e operacion draai constantemente cu un impacto ambiental mas chikito posibel,” Meyers a bisa Bon Dia Aruba.

Science, Technology, Engineering and Mathematics, STEM

E plannan di Gobierno pa uza parti di e area di Lago pa proyectonan di energia duradero of

renobabel y segun Meyers, Quanten Consortium Aruba lo participa den actividad aki. Ya caba tin discusion cu varios compania pa trece porcion di nan actividad pa Aruba y e factor elemental ta e actividadnan extra curicular. “Nos ta den comunicacion cu diferente Universidad pa trece programanan satelite na Aruba, pa coordina esaki, nos ta papiando cu companianan pa trece empleo den e area di sciencia (STEM). Esaki ta nifica cu na Aruba lo por sigui educacion na nivel di sciencia y tambe haya trabou den area di STEM. “Nos a pone hopi energia pa mira con pa facilita e proceso aki.”

Quanten Consortium Angola LLC

Meyers hunto cu Quanten tambe a lanta un consortium similar cu esun pa Aruba, pero dirigi na Angola. Ta trata Quanten Consortium Angola. Segun un relato di prensa cu a sali na Maart ultimo, e Ministerio di Recurso di Mineral y Petroleo di Angola, a otorga e proyecto di un refineria basico pa refina 100 mil bari di petroleo pa dia. A scohe Quanten Consortium Angola LLC di e ocho (8) companianan cu a participa den e destaho. Quanten lo diseña, traha, opera y lo ta doño di un refineria califica como ‘deep-conversion,’ na Soyo, Angola. E intencion di e refineria ta pa fortica economia di e pais door di reduci e dependencia riba importacion di productonan petrolero refina. Banda di construccion di e refineria, cu lo tin e flexibilidad pa procesa un variedad di crudo pa produccion di productonan cu por bay directamente na consumidor, manera gasolin, diesel, jet fuel, y asfalt. Quanten Consortium Angola ademas lo diseña, traha, y opera un terminal di tanki pa crudo y productonan final. E intencion ta pa e refineria na Soyo, Angola ta cla pa drenta den operacion na 2024.

Kico Aruba kier

Mescos cu na Aruba, e compania KBR y Cisco Systems lo ta envolvi den e refineria na Angola.

Y mescos cu ta e intencion na Aruba, lo percura pa programanan educativo na Angola, Meyers a bisa. “Nos ta tuma locual tin caba na Angola, y yuda eleva esakinan. Na Aruba, e concepto ta similar, pero nos lo mira kico tin na Aruba caba. Nos ta habriendo nos media social y asina cu e contrato na Aruba ta firma, nos lo cuminza comunica cu ciudadanonan aki na Aruba, pa puntra kico nan lo kier y haya mas intercambio pa sa kico Arubianonan mes kier.” Asina aki Quanten Consortium Aruba LLC lo por determina kico nan por contribui, for di tereno tecnnologico te na medico. “Nos ta enfoca kico hende kier y esey ta nos mision.”

Contract cu Aruba

E contracto cu Gobierno lo ta cla aki un luna, y di e momento ey lo cuminza papia cu sub-contractors pa sa ki experticio tin disponibel na Aruba y asina por inicia cu e trabounan. Paloke ta e partnernan manera KBR y Honeywell, tur ta pendiente pa e contract. “Nan tin un aña pendiente.” Aunke e ta mustra largo, segun Meyers, un proceso asina aki, pa yega na un refineria ta tuma tempo y un aña no ta largo, pasobra mester tuma tempo pa sa kico exactamente tin na e refineria di Aruba, evalua nan condicion, y despues determina con pa agrega ekipo nobo. Ta un esfuerso largo y detaye.” Quanten Consortium LLC a cuminza e analisis hasta prome cu e periodo di destaho. “Nos a mira cu e contract cu Citgo a keda termina y for di e momento ey, nos a cuminza desaroya e contacto cu diferente compania pa fula tera, y pa mira si nan ta interesa y si e operacion ta financieramente posibel.”

Jeff Meyers a bisa cu e persona cu a envolvi su persona tabata Karl Welch kende a yam’e y puntr’e si ta mira posibilidad den e proyecto di refineria na Aruba. Manera ta conoci, Karl Welch tabata hopi activo na Aruba den produccion di festivalnan internacional y tin famia na Aruba.

Blue Bell

E costo pa renoba y reconstrui e refineria na Aruba ta calcula di bay costa 3.5 biyon dollar y Jeff Meyers a bisa cu a logra e financiamento. Un importante ta Blue Bell. Blue Bell International LLC ta specialisa den prestamonan comercial y di construccion cuantioso. E compania ta financia entre otro construccion di refineria, parke solar, parke di turbina di biento, proyectonan di energia duradero, centro di data, y otro. Segun su website, Blue Bell tambe ta financia proyectonan di cannabis.