Den fin di siman aki ta bay tuma luga eleccionnan di reina di Aruba su Carnaval 70. Diasabra 13 di januari Aruba ta bay cera conoci cu su Reina Infantil y Hubenil, y diadomingo cu Reina Grandi y Sra. Carnaval. Un di e candidatanan pa e corona maximo di Reina Hubenil di Carnaval 70, Jaylienne Tromp ta conta di su preparacion y con e ta sinti cu e dianan yegando cerca.

Jaylienne Tromp ta un hobencita di 13 aña di edad, e ta bishita Maria College Mavo y ta Reina Hubenil di districto di Noord y Infinity Carnival Group.

Jaylienne ta conta cu un di su hobbynan ta baila y desde cu e tin cinco aña di edad e ta practica e hobby aki. Ademas di baila Jaylienne gusta pasa tempo cu su famia tambe, su sistema di apoyo mas grandi pa tur loke ta su participacion den eleccion di Reina Hubenil.

Jaylienne no ta desconoci pa loke ta eleccionnan di reina. Na aña 2017 el a participa den e eleccion di Reina Infantil di Noord, na unda el a sali ganadora y a bay stadion pa representa districto di Noord y a logra sali finalista.

Aworaki Jaylienne ta sigui pa su siguiente reto, cual ta Reina Hubenil, un soño cu e tin pa hopi tempo caba. “E tabata un soño di mi semper pa bay pa Reina Hubenil y aworaki ami ta bay pa Reina Hubenil y mi tanchi ta bay pa Sra. Carnaval y mi prima ta bay pa reina grandi,” el a conta.

E preparacionnan pa Jaylienne su presentacion a cuminsa for di trempan, desde luna di october trainingnan a cuminsa intensamente pa loke ta su show oficial y demas presentacionnan pa e anochi special aki.

“Preparacionnan ta bayendo hopi bon y nos ta bay all out diasabra y diadomingo. Mi ta hopi emociona pa e dia yega y mi ta cla tambe pa e dia yega. Mi ta invita henter pueblo di Noord y Aruba completo pa bin apoya ami dia 13 di januari den Aruba Entertainment Center y dia 14 di januari pa bin apoya sra. Carnaval Esther Tromp y Reina Grandi Jamilyenne Tromp,” Jaylienne a indica.

Por ultimo, Jaylienne ta manda su mensahe pa hubentud y comunidad carnavalesco di Aruba: “Mi mensahe pa tur hoben y tur carnavalista ta pa nos jump den carnaval sanamente, pa nos ta mas uni, pa no trece problema y pa nos sigui engrandece nos dushi carnaval.”