Stichting Instituut voor Kennis en Innovatie (SIKI) ta un organisacion sin fin di lucro funda na 2016 cu ta empeña pa yuda individuo y comunidad pa logra un miho calidad di bida. Nan mision ta pa provee e hermentnan necesario na individuonan y comunidad pa haci hustamente esey. E temanan cu SIKI ta sostene ta entre otro, derecho di pashent y calidad di cuido.
Jayburtt J. Dijkhoff conhuntamente cu SIKI diaranson ultimo den un conferencia di prensa a trece dilanti cu na luna di mei, juni y juli ta bay tin un campaña pa promove e “Derechonan di Pashent” na tur centro di bario di Aruba “esaki ta algo sumamente grandi pasobra hopi hende no sa nan derecho, e meta di e campaña aki ta pa promove e derechonan di pashent den comunidad, pasobra esun cu no sa su derecho ta mes cos cu no tin derecho.”
Dijkhoff ta di opinion cu esaki no ta nada positivo pa e pashent, debi cu si e no sa kico e tin derecho riba dje, e chens ta hopi grandi cu e no ta bay haci uso di su derecho tampoco, lo cual tambe ta conta pa e dunado di cuido “cu pa hopi biaha no ta informa den totalidad kico e derechonan di pashent ta encera,” el a bisa.
Pa e motibo aki, fundacion SIKI a drenta den un partnership cu CEDE Aruba pa por ta mas cerca den comunidad y ofrece e charlanan gratis, e charlanan ta bay tuma luga casi tur siman riba diaranson anochi for di 7pm te cu 9pm y tambe Dijkhoff a sigura cu ta bay ta charlanan completamente interactivo, esey ta nifica cu personanan cu por tin preguntanan of kier haya informacion tocante por ehemplo, un segundo opinion medico, esey Dijkhoff por contesta den e charlanan aki manera el a sigura.
E centronan cu nan ta bay bishita ta Centro di Bario Noord dia 3 di mei, Centro di Bario Brazil dia 10 di mei, Centro di Bario Dakota dia 17 di mei, Centro di Bario Playa Pabou 31 di mei, Centro di Bario Lago Heights 14 di juni unda e charla ta bay ta completamente na idioma Ingles, Centro Famia Piedra Plat dia 21 di juni, Centro di Bario Savaneta dia 28 di juni y ta finalisa na Centro di Bario San Martin na Santa Cruz dia 5 di juli.
Dijkhoff tambe a sigura cu tur charla ta bay tin casi e mesun topico como acceso na informacion, privacidad, derechonan y obligacionnan di pashent, responsabilidad medico, derecho di entrega un keho, AZV, cuido di adulto mayor y representacion legal.
Igualmente Dijkhoff a presenta e buki cu ta yama “Derechonan di Pashent” cu ta bay ta obtenibel tambe den e charlanan aki.
Esaki ta forma parti di un otro campaña ya cu na september, specificamente riba dia 17 ta conmemora e Dia Internacional di Siguridad di Pashent cu Organisacion Mundial di Salud tambe ta promove y e aña aki e lema ta “Eleva e voz di e pashent.” Pa asina ey por pone e pashent mas central ainda den e cuido pa mehora nan siguridad como pashent y mehora e calidad di cuido.
Tambe, el a sigura cu esaki ta algo internacional unda e pashent mester poni mas central cu ta posibel den su cuido “na Aruba nos no conoce e movemento emancipacion di pashent manera otro paisnan pero tin hopi hende cu hopi pregunta tocante kico ta nan derecho, ki informacion nan por haya, kico ta e servicionan cu nan por spera di e sector di salud y esaki ta hustamente e oportunidad pa haya sa tambe kico ley ta duna pa proteha e pashent, no ta algo specificamente di Aruba so pero na Aruba si tin hende cu hopi pregunta y esaki ta e oportunidad pa haya e contesta na e preguntanan ey.”
Tin varios punto cu ley ta duna cierto proteccion, como por ehemplo reglamento di keho loke e ta bay splica den e charlanan, kico ta e posibilidad pa bay Tuchtcolleges voor Gezondheidszorg tambe tin e posibilidad pa cuminsa un caso pa daño y perhuicio pero tambe e ta bay menciona kico ta e limitacionnan y gastonan di esaki, pa cada pashent por dicidi pa su mes kico e kier haci.
“Mi ta haci un yamada tambe cu nos por papia riba derechonan individual pero na dado momento nos tin cu papia riba derechonan colectivo, nos tin cu traha mas riba con pa mehora e sistema y esey tambe lo yuda pa e calidad y e mehora e servicio tambe,” Dijkhoff a señala.
Den comunidad tin un cierto cantidad di criticanan riba e sector medico, a puntra na Dijkhoff si e profesionalnan den area aki por haya un bista despues di tur e charlanan aki pa loke el a contesta cu e informacion aki ta general, nan ta bay contesta preguntanan specifico tambe y p’esey e ta hay’e interesante pa comunidad por acudi pa por trece dilanti nan casonan y kico nan a pasa door di dje.
Dunadonan di cuido segun Dijkhoff a sigura, tambe ta interesa den e charlanan na unda varios di nan a cumpra e buki caba y a atende un charla cu Dijkhoff a duna caba loke e ta considera cu esey ta positivo, pa motibo cu “di tur dos banda como pashent y dunadonan di cuido tin interes grandi pa haya sa caba kico ta regla den ley y kico ta e posibilidad nan den cada caso specifico pa mehora e situacion.”
Nan kier pa esaki bira mas efectivo door di Plataforma di Pashent cu tambe Fundacion SIKI a lanta pa haya miembronan activo y esnan cu kier ta informa, “den dado momento tambe tin cu bay papia cu Gobierno , den caso aki, Instituto di Calidad y sector di salud pa unda nos tin cu mehora e salud, unda nos tin cu pone e inversionnan como pais pa mehora e situacion pa e pashent.”
Door di esaki, Jayburtt J. Dijkhoff ken ta PhD a haci un estudio di seis aña na Universidad di Utecht na Hulanda unda el a gradua dos aña pasa, e ta doctor den ley den ramo di derecho di salud publico y ademas di ta autor di e buki cu e ta bende aworaki, el a skirbi un otro buki basta extenso tocante full e situacion na Aruba compara cu Hulanda y den esey tambe el a ripara tambe cu mescos cu Hulanda, mayoria di ley di salud trata proteccion di e pashent, “pero tin asina tanto ley, comision y mecanismonan di control pero unda e pashent mes a keda? Ta bay tin un momento cu mescos cu Hulanda cu tin representacion di dunadonan di cuido, seguronan medico y e organisacionnan di pashent “pasobra ta hopi straño pa nos por traha maneho nacional pero unda e representacion di pashent a keda? Eynan ta unda e plataforma ta hunga un rol pero tambe mester sigui promove kico tin caba pa personanan por haci uso di nan derecho y lo cual cu falta, eynan mester sigui traha riba dje tambe,” el a finalisa.
