Jason Brown presidente di SMAC: Carnaval 66 a termina den bon termino y tur evento tabata bon bishita

Temporada di carnaval a termina den bon termino y tur evento tabata bon bishita, asina a expresa presidente di SMAC, Jason Brown diadomingo pasa durante e ultimo parada cu a tuma luga na Playa.

Asina mes, el a duna di conoce cu tabatin algun parada cu menos hende cu otro, pero segun e mes a sigura esey tabata fuera di su control. El a sigura cu diadomingo ultimo comunidad si a sali den grandi pa apoya e parada.

Tambe el a duna comentario tocante parada di San Nicolas cu mester cuminsa 11or di mainta, despues a cambia e orario pa 12or di merdia. Tocante esaki Brown a menciona cu a tuma peticion di pueblo y carnavalistanan pa por haya mas espacio pa por prepara miho y pa pone un bunita show riba caminda.

Pa otro aña, Brown a señala cu nan ta bezig cu esey ainda y no por ofrece ningun declaracion. Despues di cuaresma nan lo duna di conoce e schedule nobo cu algun cambio riba dje.

Di otro banda, Liliana Rasmijn, vocero di Departamento di Polis di Aruba a informa cu parada grandi di San Nicolas tabatin 11 grupo cu aproximadamente 4.000 participante y casi 175 personal di polis.

E aña aki, Rasmijn a bisa cu nan a conta cu 15 detencion compara cu 16 na aña 2019. Motibonan mas comun pa e detencionnan aki tabata bringamento, buracheria y tambe posesion of influencia di algun otro substancia.

Di loke ta trata e parada di Playa, el a comenta cu tabatin e mesun cantidad di grupo y participante, pero cu un cantidad mas di agente di polis cu tabata 210 riba pia, na unda nan a coopera di diferente departamento di cuerpo policial. Durante e parada aki nan a haci 27 detencion, compara cu aña pasa cu tabatin 29 tabata casi igual; pa e mesun motibonan di buracheria, bringamento, personanan bou influencia y algun cu a tira boter di glas.

Rasmijn a trece dilanti cu SMAC a acerca Departamento di Polis hunto cu e lidernan di grupo pa asina haya un palabracion na unda cu nan a bisa pa para e parada – specialmente esun di San Nicolas – un rato pa via cu tabata bayendo ‘demasiado halto’ y cuminsa bek un tiki mas trankil. Tocante esaki el a expresa cu e resultado tabata hopi bon, pero tin di haci cu e parti di comunicacion.

Asina mes, Rasmijn a manifesta cu despues di cada parada normalmente nan ta sinta y ta evalua. El a bisa cu e ta kere cu ta miho pa e parada no cuminsa trempan, pa tur hende mester ta riba e mesun linea y no pasa algun of mesun tipo di incidente.