Ayera durante un conferencia di prensa cu SOGA a tene hunto cu AIB Bank, nan a trece dilanti cu diahuebs, pasa director di Cuido di Pashent di hospital Horacio Oduber Ezzard Cillie, a duna na otro conferencia di prensa un informacion cu no tabata corecto tocante cambernan. SOGA a bisa cu na comienso di renobacion y expansion di hospital, ya caba tabata conoci pa hospital cu pa via di construccion, nan lo tin temporalmente 30 camber menos.
Jasmin Simon, director di AIB, a expresa cu hospital tabata consciente di e situacion y nan mes a indica cu tabata prepara pa esaki. Na comienso di construccion na aña 2017, hospital a acerca SOGA pa haci un peticion di algun cambio den e proyecto.
Simon a splica cu SOGA a indica pa hospital cu si nan kier haci cambio, esey lo nifica cu na algun momento durante construccion, hospital lo tin menos cama pa pashent.
Di mesun manera, Simon a comenta cu awor cu a yega e momento cu contratistanan mester cuminsa cu su trabou na East Wing, hospital a informa SOGA cu specialistanan no lo muda y cu SOGA tin e responsabilidad pa busca un solucion, aunke SOGA a adverti tocante e asunto, pero nada no a wordo haci.
Pa e motibo aki, Simon a señala cu SOGA ta ehecutando e proyecto a base di rekisitonan y exigencianan prepara y firma door di hospital, cu ta informa riba e cantidad di camanan, y no por ta asina cu awor ta bin pone responsabilidad riba e compania.
