Dia pa dia e ta dedica na su trabou cu e mes a sigura cu ‘no ta facil’ pero e ta stimel’e cu tur su curason, e edicion special aki di Bon Dia Aruba ta wordo dedica na algun hende muhe conoci den comunidad y un di nan ta Janine Rodriguez.
Manera Rodriguez a informa e aña aki e ta cumpli 30 aña den servicio di Gobierno di Aruba y 12 na departamento di Slachtofferhulp di Cuerpo di Polis di Aruba, esun cu tur dia mester atende cu e casonan mas serio cu ta pasa riba isla aki, dunando su palabranan di apoyo pa cada un di famianan cu por a keda envolvi den diferente incidente y ta brinda asistencia na cualkier ora di dia of den oranan di anochi.
Bon Dia Aruba a haci algun par di pregunta pa Rodriguez:
Con bo ta balansa bo trabou cu bo bida personal?
Wak semper pa bo trabou ta na ordo, nunca laga cos pa mañan vooral si bo trabao ta un trabao pisa y si bo tin cu duna un man, haciel’e cu amor”.
Bo ta haya cu hende muhe den bo profesion ta haya dificultad pa wordo promovi?
No, semper haci bo trabao manera mester ta.
Como ser femenino kico tabata e obstaculo mas significante den bo carera?
Ningun, para pa kico bo ta haci.
Ken ta inspira bo y dicon?
Mi mayornan, semper nan a bisa nos 2 yiu muhenan studia pa mañan bo no mester pasa den duro, bo no sa unda bida lo hiba bo y semper tene respet pa bo mes.
Kico ta e conseho cu bo persona lo duna na e siguiente generacion di mucha muhenan lider?
Un bon lider semper ta respeta bo mes, respeta otro y tin responsabilidad pa tur accionnan para pa ken bo ta.
Bo a yega di experiencia resistencia ora cu bo a lidera un grupo di hende homber?
Semper bo ta haya bo cu resistencia “bo ta muhe” pero splica ken y pakico bo t’ey pa nan y hunto nos por bay dilanti.
Kico ta bo conseho pa e hende muhe hoben drentando den un profesion lidera pa hende homber? Sea bo mes, haci bo trabao cu respet, hopi hende homber awendia sa cu hende muhenan tambe por haci trabao di hende homber.
Unda nan lo por haya bo riba un diasabra 10or di mainta?
Na trabao sino cu mi famia.
