Jan van Nes ta considera medida di Crisis Team como un señal pa cera restaurant; Restaurantnan ta paga e prijs pa aglomeracion di hende den bar y riba parkinglot

Presidente saliente di Aruba Gastronomic Association, AGA, esta Jan van Nes ta haya cu ta miho Crisis Team anuncia ciere di tur restaurant, en bes di e medida di dos persona pa mesa. Y ta netamente restaurantnan cu ta e negoshinan cu a haci tur nan esfuerso pa mantene e reglanan di higiena y distanciamento social pa evita contagio di COVID-19.

“Si hendenan tabata comporta malo, lo por a anuncia e decisionnan nobo for di diabierna pasa,” van Nes a bisa, “unda por yuda tuma medidanan adicional prome cu e fin di siman aki. Pero e logica di dos persona na un mesa ta incomprendibel. Turistanan ta bin Aruba cu amigo, cu cuater hende. Nan cuater ta tuma un taxi, pero ora yega restaurant, con ta bay separa nan? E no ta haci ningun sentido.”

E medida ta descurasha y ta un otro sla pa e sector cu a inverti hopi pa mantene na reglanan di DVG. “E ta yega na un punto, cu solamente por uza terasa. Cu tur e reglanan di distanciamento social mi por a sirbi 16 hende. Pero awor ta unicamente 8.” Riba dje, van Nes ta premira discusion cu turistanan cu ta yega un restaurant y ta haya e informacion cu nan mester ta separa. E ta kita hopi animo pa maneha un operacion asina.

Medida

“Mi ta respeta kico Crisis Team ta haci. Mi ta respeta kico tur instancia ta haci. Pero mi mester bisa si cu for di aña pasa, no a tuma contacto cu nos asociacion,” Jan van Nes a bisa. “No a tuma contacto pa nos, ni ora cu a amplia e medidanan ni ora cu a haci nan mas severo. Ningun momento nos tabatin contacto cu Crisis Team.”

E decision a dal duro, pero van Nes a bisa cu no tabata sorprendi cu a bin cu pasonan nobo. A ripara movecionnan grandi den fin di siman tras di lomba y tabata mira e casonan aumenta. “Nos tabata spera algo, pero pa baha di cuater na mesa pa dos, cu excepcion si tin yiu chikito. Pakico no papia cu nos? Pakico no busca kico por y kico no por. Na e momento aki, Aruba por ehempel, tin seis Chef’s Table concept (mesanan reserva cu un grupo specifico unda e chef ta prepara cuminda pa un grupo) cu ya caba mester a corta e cantidad di asiento na mita. Y awor nan por wel di cera te cu 31 di Maart. Y tin reservacionnan cu haci caba, cu awor mester bay cancela.”

Contagio den restaurant

Restaurantnan di AGA ta hiba e protocolnan di higiena cu tur detaye. For tuma temperatura, te e handsanitizers y e registro di dato pa por contact despues, y tin distanciamento social, uzo di tapaboca, y handschoen.

“E contagio den restaurantnan na Hulanda tabata calcula na dos porciento. E contagio ta na bar, na beach, den parkinglot, unda hende ta aglomera cu nan cooler yena cu alcohol. Ta eynan mester a tuma paso concreto. Diahuebs na Eagle Beach no tabatin luga pa para auto y pone hende. Tabatin asina hopi hende cu casi no por a core riba e caminda. Pero e restaurantnan mes tabata keto riba 18 di Maart, cu normalmente ta un dia hopi popular pa hende sali bay come. Nos tabata keto. Y mi ta sinti cu no a haci algo pa a preveni esey.”

Forsa pa cera restaurant

Jan van Nes ta puntra pakico no ta comunica cu AGA. E ta sinti cu casi ta forsa restaurantnan pa cera, simplemente no kier bisa esey. “Tuma un reunion di negoshi di empresarionan local. Ya nan no por bin cu cuater, sino cu dos. Casi por bisa cu Crisis Team no kier a instrui restaurantnan pa cera, pero ta pusha e pensamento si.” Si unicamente por opera cu dos persona pa mesa, combina cu e conceptonan di Chef’s Table, no ta keda van Nes pa saca otro conclusion cu locual kier ta pa e restaurant cera.

E consecuencia no ta unicamente pa e doño di restaurant, pero tambe e trahado cu kizas pa e simannan aki lo por haya su subsidio di salario, pero lo no por suplementa esaki cu e tipnan cu normal e ta ricibi. “Aki ta bay mishi entrada di hopi hende.”

Riba dje, van Nes ta kere cu algun restaurant lo no nenga turista pa sinta cu cuater. Pues lo tin un competencia inhusto. “Y riba dje, nan lo controla tur restaurant pa wak si nan ta cumpli?”

Lo no sinta cu man crusa

AGA ta bay manda un carta na Crisis Team pa reconsidera y asina por lo menos permiti pa cuater hende sinta na mesa , pasobra banda di e sla economico, e ta crea iritacion cerca turistanan. “E no ta duna ningun sentido.”

Crisis team tin e datonan pa por saca afo unda e contagio ta sosode. Van Nes mes ta kere cu ta den e barnan unda ta mira aglomeracion grandi sin cu realmente tabata controla. “A cera algun bar, pero mayoria no. Pero un restaurant di famia cu tin tur su protocol mester baha su produccion? Di mes nos tin 50 porciento menos benta compara cu e periodo prome cu COVID-19. Ya cu e poco cu tin, no ta fuente di aglomeracion. E ta keda e bar y hendenan riba parkinglot cu nan propio bebida. Ta esey mester stroba. Awor ta bin restaurantnan cu tin asina poco benta caba, ta nifica practicamente un ciere pa nos.”