Su Excelencia,

Pronto lo toca un aña cu e promer restaurantnan a cera na Maart 2020 como parti di e lockdown causa pa Covid-19. Nos por wak back ariba un aña cu hopi desafio unda nos sector a confronta oranan di apertura y cera diferente, shelter in place, restriccion di cantidad di persona na mesa, y varios operador di food & beverage a cera e ultimo aña mientras algun no a habri nan porta ainda.

Nos por wak back tambe ariba e hecho cu desde maart di 2020 NINGUN reunion a tuma lugar cu su persona como Minister di Labor. Cu tampoco un reunion di Tri-Partiet a wordo convoca aunke e peticion pa un reunion di Tripartiet ta bay back pa dia 6 di October 2020 cu un agenda. Cu tampoco nos sector a wordo respondi ariba nos peticion pa un reunion, en fin un silencio total di parti di su Ministerio di Labor mientras cu e dificultadnan, e conflictonan y retonan ta acumulando. Ta parce cu e beleid ta uno na unda nos ta bari tur a retonan cu tin bao e tapijt cu e speransa cu nan lo desparace nan mes. Y retonan tin:

A. Dia 6 di October 2020 a sali un peticion pa un reunion Tripartiet tuma lugar di parti di varios gremio y a lista e siguiente agenda y a propone “flexibilization of the labor laws” como e topico proximo y muy en specifico:

1. Contrato cu un duracion fiho;

2. Pensioen obligatorio;

3. Oranan di trabao flexibel;

4. Reduccion di oranan di trabao;

5. Cantidad maximo pa un empleado a base di terminacion di su contrato di trabao.

A confirma recepcion di e carta aki fecha dia 7 di October y for di e dia ey no a tende nada mas! Otro retonan:

B. Falta incentivo pa personal den Fase of sin trabao pa drenta servicio di un dunado di trabao. E momento cu un dunado di trabao tuma algun persona den dienst e peso di e sueldo ey ta cay pe 100% ya cu personal inscribi na SVB dia 15 di maart 2020 so ta cualifica pa ricibi loon subsidie.

C. Tambe e formula di otorga subsidio di salario a base di cifranan di 2019 lo no cualifica mas, si dunado nan di trabao un djis mester compara subsidio a base di cifranan di benta basa riba 2020. Ta urgi pa adapta e formula aki ASAP ya cu si no e subsidio lo muri un morto natural y asina hopi negoshi. Nos ta referi tambe na carta di AHATA/ ATIA di 27 di januari cu ta toca e mesun tema dirigi na MINFIN.

D. E terminonan pa otorga permisonan ta tal cu tin hopi empleado cu antes tabatin un permiso ya no ta conta cu AZV door cu nan papelnan ta pa revision na DPL y mientras tanto nan papel no yega Dimas nan no ta conta cu seguro medico. Pa kende su cuenta gastonan medico di un empleado ta core si e contagia seriamente cu Covid?

E. Dunadonan di trabao no mag di despedi empleado pero cu permisonan no otorga no ta keda otro di despedi personal sin permiso mientras cu no tin reserva pa esaki. Mientras tanto tambe hopi pais Latino ta cera pa trafico aereo e personal aki sin permiso no tin otro alternativa cu keda Aruba desemplea y posiblemente lo drenta trahando zwart!

E serie di retonan aki solamente por wordo resolvi unda tin dialogo pero mientras cu NO tin dialogo nan lo sigui acumula.

Pa e motibo aki nos sector ta manda pidi pa dialogo urgente pa locual ta flexibilizacion di labor y pa un Tripartiet tuma lugar lo mas pronto cu ta posibel.