(AP) – Britney Spears su tata a bisa den documentonan entrega na corte riba diahuebs cu e tin plan di retira for di e conservacion cu tin mas di 13 aña ta controla e bida y placa di su yiu, pero e dia di su retiro te ainda no ta den bista.

James Spears a somete documentonan legal bisando cu mientras no tin base pa su retiro, e lo baha for di e posicion despues cu varios diferente conflicto ser resolvi. E documento no ta duna un idea ni sugerencia di den ki tempo e lo resigna e posicion di controla su yiu su finanzas.

‘Meneer Spears ta sigui eherce su trabao y cumpli cu su responsabilidadnan, y e no mester ser suspendi ni tampoco kita, y mucho menos a base di alegacionnan falso,” e documentonan a conta. “Meneer Spears ta dispuesto na resigna y baha for di e posicion aki na e momento adecua, pero e transicion mester ta uno den orden y mester inclui resolucion pa cu e conflictonan pendiente.”

E conflictonan aki ta inclui e siguiente reviso hudicial di e cantante su finanzas, cual a ser posponi pa motibo di e reciente lunanan cu acusacionnan publico y legal tocante James Spears su rol y e duda di e legitimidad di e conservacion pa Britney Spears.

E documentonan ta bisa cu James Spears tabata e “recipiente principal di atakenan sin ningun hustificacion” pero “e no ta kere cu un bataya legal cu su yiu muhe pa cu e servicio cu e ta haci como su conservador lo ta den su miho interes.”

Tambe ta menciona cu James Spears lo apela y lucha contra e peticion di forsa su persona retira, pero lo traha hunto cu e corte y Britney Spears su abogado Matthew Rosengart durante e proximo fasenan.

“Nos ta contento cu Meneer Spears y su abogado a concede awe un documento unda cu e ta admiti e hecho cu e mester ser removi for di e conservacion,” Rosengart a bisa den un declaracion. “Esaki ta un logro pa Britney.”

Spears a revela cu for di prome cu su yiu a contrata Rosengart luna pasa, ya caba e tabata trahando riba e plan di retira for di e posicion.

Pa mayoria di e existencia di e conservacion aki, cual a ser estableci den aña 2008, James Spears tabata e persona cu tabata controla su yiu su asuntonan personal y tur su placa. Den aña 2019, el a baha for di e posicion como convservador di su persona, a permanece conservador solamente di Britney Spears su finanzas.

E tabata e recipiente di hopi di Britney Spears su rabia den algun declaracionnan cu el a haci dilanti corte den juni y den juli, den cual el a referi na e conservacion aki como “abusivo.” Pears den su remarcanan haci den juni, a revela cu el a ser obliga di usa un aparato intrauterino pa e no haya yiu, tuma medicina contra su boluntad y a ser prohibi di casa, tin otro yiu, y te hasta a ser prohibi core den auto cu su pareha sin supervision.

“E conservacion aki ta haciendo mi persona mas dano cu bon,” e cantante di 39 aña a bisa na durante su declaracion e tempo aki. “Mi ta merece di bida mi mesun bida.”

James Spears, di 69 aña di edad tabata luchando pa permanece den control den e documentonan someti na corte te cu siman pasa. El a bisa cu e acusacionnan di su yiu den su contra ta “sin base,” mester di investigacion y ta envolve asuntonan y conflictonan cu ta fuera di su control.

El a sugeri cu Jodi Montgomery, ken ta e persona cu a reemplasa James como conservador di Britney Spears su asuntonan personal, ta merece critica si e acusacionnan di Britney Spears ta corecto.

Rosengart a bisa cu mientras cu e ta aprecia y acepta e movida nobo aki di meneer Spears, e no lo tuma e presion di James Spears, ken no lo mester warda pa retira.