Ministro encarga cu turismo di Jamaica, Edmund Bartlett, a anuncia recientemente den un charla na Montego Bay, cu su pais a duna bonbini na un miyon bishitante den e prome nuebe siman di 2019. Segun Bartlett esaki a duna beneficio financiero di aproximadamente US$ 800 miyon.
“E industria actualmente ta na su peak di crecemento, y e bunita den nos turismo ta cu nos ta percura pa peak nobo… pasobra nos ta den un estado di constante crecemento y evolucion. E peak aki a permiti Jamaica pa ta e prome destinacion den Caribe pa yega na un miyon bishitante den nuebe siman,” segun Bartlett a conta.
Bartlett a bisa cu e crecemento continuo di turismo, su ministerio ta tumando paso pa sigui desaroya Jamaica su Gastronomy Network, o a sigura cu e ciudadnan comun di Jamaica tambe por beneficia di e desaroyo positivo den e sector aki.
“88 porciento di biahe na mundo ta pa experiencia di cuminda, y Jamaica lo tin e miho oportunidad pa crea e miho experiencia cu cuminda cu un bishitante lo por desea. E experiencia aki mester ta propiedad di Jamaiquino, no di stranhero,” e ministro a opina.
“Turismo gastronomico ta bay ta e impulso mayor pa un miho producto turistico di experiencia na Jamaica, pero lo ta e base tambe pa un grupo grandi di Jamaiquino comun por ta envolvi den e cadena di balor di turismo,” el a añadi.
Mientras tanto, Bartlett a informa cu e Tourism Linkages Network lo bay inverti mas di US$300 miyon den e aña fiscal 2019/20 den mas desaroyo di e industria.
E obhetivo principal di Tourism Linkages Network ta pa incrementa consumo di producto y servicio cu por adkiri localmente na prijs competitivo. E ta dirigi tambe na crea empleo mientras ta genera y mantene e potencial pa tene divisa dentro di e pais.
