Ministro di finanzas y di servicio publico di Jamaica, Audley Shaw, ta bisa cu Jamaica lo mira un inyeccion di mas di US$20 biyon na inversion nobo, cu lo yuda impulsa economia y aumenta creacion di empleo.
Papiando pa un Foro di Fondo Monetario Internacional (IMF) y Banco Mundial pa Estadonan Chikito na sede pricipal di Banco mundial diasabra pasa, ministro Shaw a nota cu e inversion grandi aki no ta un prestamo di banco o di IMF, sino un inversion directo na Jamaica di sector priva y di inversionista di exterior.
“Gobierno ta den un drive pa move Jamaica padilanti, atrayendo inversionnan grandi pa e pais, loke lo ta un mashin pa impulsa economia,” el a indica.
El a conta e participantenan cu gobierno a enfoca riba un serie di proyecto di desaroyo di infrastructura, cu lo move economia den direccion di crecimento.
Esakinan ta inclui reapertura di e planta di aluminio di Alpart, cu un inversion di mas di US$3 biyon pa expande e facilidad, redestinacion di e terminal di container mayor di e pais, construccion di e highway Norte – Sur, y e rehabilitacion di downtown Kingston.
E ministro a indica cu tin un programa agresivo pa reduci e pais su corelacion di debe compara cu producto interno bruto (debt/GDP ratio), di 116% actualmente, pa 108% pa fin di e aña fiscal aki, y despues mas abao pa 96% pa aña 2020.
El a declara cu Jamaica tin intencion di traha cu Banco Mundial y otro agencia multinacional pa desaroya e recursonan humano y di capital di e pais, pa por laga economia crece.
