(JamaicaGleaner) – Jamaica a haci un oferta formal pa cumpra e participacion di 49% di Venezuela den e refineria Petrojam, e unico refineria di petroleo di Jamaica, e corant di Jamaica The Gleaner. E ministro di Energia, Andrew Wheatley, a haci e revelacion den un publicacion riba Twitter. E oferta a ser haci den un reunion na Caracas, Venezuela. E noticia a cuminsa circula ora un ekipo di nivel halto di gobierno integra pa sr. Wheatley, e minister di Asunto Exterior, Kamina Johnson Smith y tecniconan a bay Venezuela pa haci’e oferta. Desde basta tempo caba e gobierno di Jamaica tabata considera haci e oferta na e partner Venezolano, pero ta bisa cu e asunto a haya un recepcion bastante friu cerca e Venezolanonan. E pais petrolero ta posee 49 porciento di Petrojam a traves di PDVCaribe, un filial di Petroleos de Venezuela (PDVSA).
E plannan pa mehora e refineria deteriora di Petrojam conhuntamente a keda na un segundo plano durante hopi aña y e atencion principal di e partner Venezolano tabata enfoca riba e recesion economico y instabilidad na nan pais. Mientras tanto, Jamaica no por a avansa cu e mehoracion pa garantisa suministro di producto petrolero na su mercado interno. No tabatin declaracion oficial di gobierno Venezolano encuanto e oferta ainda.
