(AP) — Prome Minister di Jamaica, Andrew Holness a anuncia ayera cu su pais lo manda dos decena di soldad y agente di polis na Haiti e siman aki pa reforsa e mision lidera pa Kenia cu sosten di ONU pa combati gangnan violento.
E 20 soldad y cuatro agente di polis ta programa pa yega diahuebs y ta bay uni casi 400 polis Keniano cu a yega anteriormente e aña aki y ta trahando banda di ehercito y polis Haitiano, segun vice-Admiral Antonette Wemyss-Gorman, hefe di staff di defensa pa ehercito Jamaiquino.
E Jamaiquinonan ta bay ta responsable pa provee comando, planeamento y sosten di logistica, Holness a bisa den un conferencia di prensa. Jamaica a priminti un total di 170 soldad y 30 agente di polis, pero Holness a bisa cu no tabata posible pa desplega nan tur na mes momento.
“E no ta practico,” el a bisa, agregando cu e facilidadnan pa alberga esnan yegando y un structura di comando mester ta na lugar prome cu manda e cantidad completo priminti. “Nos kier un operacion hopi exitoso.”
E cantidad inicial di polis y soldad anuncia pa Holness a sorprende hopi y ta yega na momento unda gobierno Mericano a adverti cu e mision lidera pa Kenia falta placa y personal mientras ta considera un mision di paz di ONU como un manera pa sigura mas recurso. Un propuesta asina lo mester keda dicidi pa Conseho di Seguridad di ONU, cual expertonan ta kere no lo aprob’e.
Dialuna, Secretario General di ONU, Antonio Guterres a bisa cu “ta hopi straño” cu aparentemente no tin placa disponible pa sostene e mision lidera pa Kenia. “Mi ta kere cu paisnan mester asumi responsabilidad y mester bin y provee e fondonan necesario,” el a bisa.
Holness no a comenta riba e posibilidad di un mision di paz di ONU, pero a bisa cu e mision actual “por ta un proceso largo y extendi.”
El a agrega cu e mision no ta e unico, ni e final, solucion pa e problemanan na Haiti, unda gangnan ta controla 80 porciento di e capital Port-au-Prince.
Violencia a plama na otro areanan di e pais, cu mas di 3,200 asesina di januari te mei, segun ONU. E violencia andando tambe a laga mas di mita miyon persona sin hogar den añanan recien.
“Haiti ta e ehemplo di kico por pasa si estado y gobiernonan no tuma e problema na serio y ta pone medida y recursonan necesario na lugar pa trece e problema bao control,” Holness a bisa.
En general ta spera cu e mision ta bay tin un total di 2,500 personal, cu Bahamas, Bangladesh, Barbados, Benin y Chad tambe primintiendo pa manda polis y soldad, maske no tabata cla na ki momento esaki lo sucede.
Diasabra, minister di Exterior di Bahamas, Fred Mitchell a bisa reporteronan cu mientras gobierno no a tambalia den su promesa, no ta cla na ki momento lo desplega trupanan na Haiti mirando cu dinamica di e mision a cambia. “Un di e cosnan cu Bahamas mester considera ta e posicion nobo di Merca,” el a bisa.
Ta spera cu e mision lo costa alrededor di $600 miyon pa aña, maske ONU a ricibi apenas $68 miyon di e $85 miyon priminti te awo. Merca y Canada a provee mayoria di e fondonan te awo.
