Den un presentacion reciente pa Camara di Comercio di Jamaica (JCC), director di Turismo Donovan White a recorda palabranan di ministro di Turismo Edmund Bartlett: “E ta un trabao enorme, pasobra ta un turismo nobo cu ta surgiendo globalmente. E ta bay requeri un comprendemento nobo, en berdad un re-imaginacion di turismo manera nos conoce awor.”
E pandemia di Covid-19 a dal un golpi devastador na industria turistico global. World Travel & Tourism Council (WTTC) – e organisacion mundial cu a yuda e industria recupera den crisis den pasado – ta calcula cu turismo tabata representa 31 porciento di Jamaica su GDP na 2019. Nan ta inclui den nan calculacion e contribucion directo di turismo, e actividadnan di restaurant y di actividad di pasatempo directamente apoya pa turista.
E cifra general, na alrededor di tres biaha e impacto directo so, ta refleha e impacto mas amplio “indirecto” riba GDP di inversion di capital di actividad cu ta relaciona cu turismo y efecto riba cadena di suministro riba negoshinan local, bomo tambe efecto “induci” di placa usa pa esnan emplea den sector turistico local.
Region di Caribe naturalmente ta e region di mas dependiente di turismo na mundo. Jamaica su caida proyecta di turismo pa aña 2020 lo ta similar na e reduccion global calcula di entre 60 -a 80 porciento. Poni di manera simple, si Jamaica tabata gana US$10 miyon pa dia na 2019 na entrada di turismo (US $3.64 biyon, di cual US$3.48 biyon tabata di 2.68 miyon stopover, cu un poco mas di 1.5 miyon pasahero crucero contribuyendo e restante US$156 miyon), lo ta ganando awor mas o menos US$3.5 miyon pa dia na 2020, cortando e pais su entrada na divisa na alrededor di mitar debi na e dependencia halto di turismo.
Jamaica Tourist Board ta calcula cu alrededor di 350.000 persona ta depende di turismo pa nan entrada. E impacto inmediato di e pandemia tabata retiro di 153.000 empleado, o 90% di e forza laboral diecto di turismo, cu no ta inclui un impacto similar o mas severo ainda riba e trahadornan indirecto.
