Prome Ministro Andrew Holness a declara recientemente cu e proyecto nobo di un terminal flotante di deposito y regasificacion ta demostra cu e pais ta consciente di proteccion di medio ambiente, comprometi cu reduccion di costo di energia y cu esaki awor ta haci Jamaica un hub principal di LNG, den su discurso na e ceremonia di apertura di e terminal siman pasa, pafo di costa di Old Harbour Bay na St Catherine.
“Nos ta demostrando cu nos por pone e inversionnan necesario, construi infrastructura cu ta reduci costo pa consumidor, pero mas importante ainda, ta reduci e costonan pa medio ambiente, y mi ta kere cu esaki ta un bon ehemplo di esey,” el a declara.
E prome ministro a remarca cu e ultimo introduccion di suministro di LNG na e pais ta den linea cu e politica di energia di Jamaica, cu ta pidi pa desaroyo di su potencial di recurso energetico, pa mehora competitividad internacional y siguridad energetico, mientras ta reduci e ‘carbon footprint’.
“Loke mi gusta di esaki ta cu e ta mas amigable pa medio ambiente, ya cu e ta kima significantemente mas limpi cu otro combustibel basa riba petroleo. Durante ultimo decada, LNG tabata aproximadamente 30% mas barata cu diesel y e proyeccion ta cu e ta keda mas barata cu combustibel distila (di petroleo),” Holness a bisa.
Opera pa un compania internacional di energia, New Fortress Energy terminal, cu ta e prome den su categoria den Caribe, lo provee combustibel mas barata y miho pa medio ambiente, entre otro na un central di energia electrico nobo di Jamaica Public Service (JPS) di 190 Megawatt na Old Harbour, a traves di tuberia pa gas natural.
