South Jamaica Power Company (SJPC), un compania di servicio publico a caba di completa test rigoroso di confiabilidad di su planta totalmente nobo na Old Harbour y cu ta operativo den dianan di Pasco. E planta ta opera completamente riba gas natural y ta provee energia mas limpi y eficiente.
SJPC a cuminsa e proyecto na e sitio na bahia di Old Harbour na maart 2017. Construccion a costa US$330 miyon, y e proyecto ta emplea mas di 470 Jamaiquino durante construccion. Despues cu a termina construccion, a cambia e nomber pa South Jamaica Power Centre.
South Jamaica Power Centre lo ta e productor di electricidad mas eficiente cu ta kima combustible fosil. E planta lo hunga un papel crucial den mehora confiabilidad di e sistema y ademas provee energia mas limpi cu e plantanan bieu cu e ta reemplaza. E planta nobo di 194MW lo reemplaza diferente unidad di 50 aña bieu cu tabata opera riba heavy fuel oil (HFO). South Jamaica Power Centre ta e di dos planta di energia cu ta opera riba gas natural, despues di e conversion di Bogue Power Station na Montego Bay, cu a cambia di Automotive Diesel Oil (ADO) pa gas natural.
E integracion di mas forma di energia renovable y tecnologia mehora (manera gas natural) lo disminui Jamaica su riesgo pa loke ta variacion di prijs di petroleo riba mercado internacional. E planta nobo riba gas natural ta reemplaza e unidadnan bieu riba HFO cu tabata contribui gran parti di e energia genera na e pais. E cambio pa gas natural lo resulta den energia mas limpi y mas di acuerdo cu normanan di medio ambiente.
South Jamaica Power Company Limited (SJPC), ta un joint venture cu MaruEnergy, JPSCO 1 SRL, EWP (Barbados) 1 SRL y Petro Caribe Development Fund. E empresa Spaño TSK tabata contrata pa completa e planta nobo.
