(JamaicaObserver) – Passport, Inmigration and Citizenshio Agency (PICA) ta bisa cu no tin merito na e acusacion cu nan sistema interno a ser viola y ta insisti cu nan ta “mantene e standardnan mas halto di seguridad di informacion”.
E organisacion a haci e declaracion den un comunicado di prensa dialuna ultimo, den un respuesta obvio na acusacion di un violacion di data den e disputa politico actual tocante e lider di Oposicion, Mark Golding su paspoort.
Minister di Gobernacion Daryl Vaz a inicia e controversia siman pasa ora cu el a revela cu na 2011 of 2012 Golding a pidi pa un paspoort Jamaiquino na edad di 46, cinco aña despues di sirbi como legislador den e Camara Halto.
Esaki a causa un reaccion for di e Partido Nacional di Pueblo (PNP) pidiendo pa un investigacion ariba loke e partido a bisa ta un violacion di data significante y a acusa Vaz di publicamente skirbi informacion tocante interaccionnan priva di Golding cu PICA.
Sinembargo, Vaz a nenga cu el a haya e informacion for di PICA. Na luga di esaki, el a bisa cu el a haya esaki “profundo den e bariga di e PNP”.
Dialuna PICA a bisa cu nan a emiti e comunicado despues di haci e verificacionnan necesario.
“E preocupacionnan cu a ser treci dilanti no tin base. Nos kier sigura e publico cu PICA ta dedica completamente na mantene e standardnan etico mas halto na momento di trata cu datonan personal. Nos ekipo dedica ta pasa den training regular pa keda actualisa riba menasanan di seguridad cu ta desaroya y pa mehora nan practicanan. Esaki ta reforsa nos compromiso pa mantene e confiansa poni den nos pa e hendenan di Jamaica,” e agencia a bisa.
Indicando cu proteccion di confidencialidad y integridad di datonan personal ta primordial, PICA a bisa cu nan ta opera bao di un marco robusto pa garantisa cumplimento cu tur e ley- y regulacionnan relevante na proteccion di data.
“Nos procedementonan ta adheri estrictamente na standardnan halto, sigurando privacidad di individuonan y preservacion di integridad di informacion sensitivo,” PICA a bisa.
“Manera un organisacion encarga cu informacion sensitivo cu ta integral na seguridad nacional y asuntonan di inmigracion, PICA ta keda vigilante den su compromiso na seguridad di informacion. E agencia ta mara na reglanan local y internacional pa seguridad y identidad; p’esey, continuamente nos ta revisa y mehora nos medidanan di seguridad pa trata cu menasanan crea y avancenan tecnologico,” nan a agrega.
“Nos ta keda transparante y responsable, sigurando cu e confiansa di publico den nos capacidad pa proteha nan dato ta keda firme,” PICA a insisti.
