Un di dos districto a ser proclama bao di estado di emergencia na Jamaica, pa e Division Policial North St. Catherine, alegando un aumento considerabel di crimen y asesinato relaciona cu banda den e area, como e motibo principal.

Den un rueda di prensa diadomingo pasa, prome ministro di Jamaica Andrew Holness, conhuntamente cu miembro di e cuerponan arma di Jamaica y otro oficial di siguridad nacional, a declara cu e estado di emergencia nobo aki lo dura 14 dia.

Mas tempran e aña aki, a proclama un estado di emergencia pa St James Parish, cu ta inclui tambe e area turistico di Montego Bay, pa 14 dia desde 19 di januari, loke a ser extendi te mei 2018. Holness a bisa den su declaracion relaciona cu e mas reciente estado di emergencia pa St Catherine: “E cuerponan di siguridad lo tin poder extraordinario, y cierto derechonan lo ser suspendi. Esey no ta implica cu e uzo di e podernan extraordinario aki por ta arbitrario o cu nan no ta supervisa. Ta spera di e forsanan di siguridad y nan ta instrui pa trata ciudadano cu respet y cu nan ta proteha e dignidad y siguridad di tur ciudadano di Jamaica.”

Tur actividad den e area di North St Catherine lo ta restringi, un ‘toque de queda’ ta vigente, tur persona ta bao di un maneho di “stop and search” pa tur trafico di vehiculo y na pia, y tur caretera lo tin presencia fuerte di polis y di forsanan arma combina.

Lo anuncia proximamente un tribunal di revision di poder di emergencia, di acuerdo cu e ley encuanto poder di emergencia. Adicionalmente, e podernan di emergencia a ser publica caba den e gaceta oficial y aproba pa e gobernador general.

Continuando cu su declaracion, Holness a bisa cu e lo dirigi palabra na parlamento encuanto e poder di emergencia aki den e proximo sesion.

Comisario di polis interino Clifford Blake a expresa cu, debi na e aumento grandi di uzo di arma di candela, traficacion di droga y actividad relaciona cu banda, particularmente e notorio Clansmen Gang cu ta uza e area North St Catherine como su base, adicional na e lucha interno den cual nan ta envolvi, aparte di otro actividad di extorsion y demas actividad criminal, e area di North St Catherine y Spanish Town a bin ta sufri bao di e peso di crimen y violencia.

Di acuerdo cu estadistica brinda pa Blake, tabatin 30 asesinato den e area di North St Catherine aña pasa, pero tin un total di 48 pa e aña aki den e mesun periodo di inicio di aña. Tabatin un total di 136 asesinato registra na 2017 pa e area ey so, y e tendencia ta pa sigui aumenta den direccion di 330 asesinato pa e area manera cos ta, a menos cu algo ta ser haci pa cambia e rumbo aki.