Presencia di obesidad cerca mucha a bira doble di loke e tabata cinco aña pasa, lagando profesionalnan den sector medico preocupa pa futuro salud di hubentud. 

Dr. Tamu Davidson, directora di division di enfremedad no transmisible y di prevencion di herida di Ministerio di Salubridad, a bisa cu referencia na prevalencia di obesidad entre mucha di edad 13 pa 15 aña, cu e cifranan a duplica desde e ultimo investigacion na 2010.

“E informe reciente di Organisacion Mundial di Salud (World Health Organization) aña pasa a mustra un duplicacion di e tasa di obesidad mundialmente di 1990 pa 2017, pero dentro di un lapso di tempo cortico nos a mira e duplicacion ey aki. Nos datonan mas reciente ta mustra cu den un tempo cortico – cinco aña – nos a mira un duplicacion di e tasa di obesidad entre mucha di 13 pa 15 aña”, sr. Davidson a bisa, mientras e tabata dirigi palabra na editor y reporteronan na e ‘Jamaica Observer Monday Exchange’ di dialuna 29 di januari, pa promove e Luna di Curason di Heart Foundation of Jamaica, cu ta cuminsa diahuebs dia 1 di februari.

Sr. Davidson a apunta mas aleu cu e preocupacion grandi encuanto e duplicacion di e tasa di obesidad tin di haci tambe cu e implicacion cu esaki tin pa diabetes tipo II, entre otro enfermedadnan cu ta resulta di obesidad infantil. Loke esaki ta haci ta pone muchanan den un posicion di enfermedad no transmisible y otro problema, desde tempran den nan bida.

Na 2010, e ‘Global School-based Student Health Survey’ (GSSHS) na Jamaica a informa cu pa e grupo di 13 pa 15 aña, 18,1% di mucha homber y 25,2% di mucha muhe tin sobrepeso, y 5,3% di mucha homber 6,7% di mucha muhe ta obeso.

E informe nobo di 2017 di e investigacion GSSHS ta mustra un imagen alarmante ora compara esaki cu esun di 2010, cu tasa di obesidad pa mucha homber cu a bay di 5,3% pa 10,3%;  mientras cu pa mucha muhe esaki a bay di 6,7% pa 9,9%.

Cu e informacion aki, sr. Davidson ta bisa cu e asunto mas alarmante ta cu e aumento a tuma lugar den un tempo asina cortico. El a indica tambe cu ministerio di salud, hunto cu academia y organisacionnan no gubernamental a establece un meta pa reduci tasa di obesidad cu cinco porciento na aña 2025.

E Heart Foundation, den celebracion di e Luna di Curason na februari cu e lema ‘Healthy Nutrition, Know Your Labels’, lo inicia cu un serie di iniciativa di educacion publico dirigi na influencia cambio di comportamento entre Jamaikino, relaciona cu nan habitonan di consumo y di salud cardiaco.