Dos anuncio importante na Jamaica ta indica confiansa creciente den nan desaroyo economico. E lansamento di e ‘Electronic Single Window (ESW)’ mester bira un ‘game changer’ pa tur importador y exportador.
Presidente di e Conseho di Crecemento Economico (Economic Growth Council; EGC), Michael Lee-Chin, a bisa cu EGC a yuda cambia perspectiva di e pais pa yega na un crecemento economico mas fuerte. Desde 2016, “debe compara cu GDP a cay di 147% te bao di 100%, y reservanan internacional actualmente ta mas di 3,1 biyon dollar, y inflacion ta na 2,4%.” “Confiansa di consumidor ta na 177,5% y confiansa empresarial ta na mas di 151%, su punto mas halto historicamente.”
E logronan aki ta parcialmente debi na e trabao di EGC, estableci na 2016, cu “a traha duro pa sigura cu proyectonan ta haya follow up, y tabatin mas di 380 reunion cu stakeholder.”
E creacion di e Electronic Single Window (ESW) cu ta forma parti di Jamaica su Programa di Facilitacion di Comercio mester haci e diferencia pa empresanan den importacion y exportacion.
Ministro di Industria, Comercio, Agricultura y Pesca, Audley Shaw, durante e lansamento oficial di e Jamaica Trade Information Portal, a bisa cu “ESW lo resulta den miho eficiencia den haci negoshi, reduciendo tempo y costo di transaccion, y den miho uso di recurso.”
E sistema cu ta parti di e Programa di Facilitacion di Comercio ta integra aproximadamente 20 agencia regulador na frontera den un solo plataforma, pa tur documentacion relaciona cu comercio, implementa pa Aduana di Jamaica.
Esaki lo permiti empresanan importador y exportador entrega documento electronico y ta facilita intercambio di informacion cu entidadnan gubernamental. E lo reduci puntonan di contacto di cinco pa un solo agencia. Esaki ta inclui formulario pa solicitud, licencia y permiso como tambe link cu diferente entidad envolvi den facilita comercio.
“Licencia rekeri pa mas di 14 producto a keda elimina,” ministro Shaw a bisa, “pa gradualmente reduci e ‘red tape’ innecesario relaciona cu cumplimento den comercio.”
“Jamaica mester trece su leynan comercial den siglo 21, den linea cu tendencianan global y necesidadnan actual.”
