Fondo Monetario Internacional (IMF) ta urgi gobierno di Jamaica pa atende di inmediato e fayonan den sector publico cu ta stroba crecemento economico.
Den un informe despues di e di cinco revision bao di e actual areglo special di supervision pa Jamaica, IMF a bisa cu a logra yega na crecemento economico mas fuerte, pero ta pidi pa accion den sector publico y priva.
Di acuerdo cu IMF, e flexibilisacion fiscal cu e reduccion di e surplus primario cu mey porciento di GDP ta apoya crecemento y ta duna espacio pa gasta den areanan manera infrastructura, cuminda na scol y transporte.
Tambe e Fondo a argumenta cu mas reduccion den impuesto cu ta distorciona lo apoya actividad economico y creacion di empleo, pero ta nota tambe cu mester atende asunto cu ta inclui corupcion. Por logra esaki parcialmente, dunando e Comision di Integridad mas poder, introduci regulacion pa un proceso mas solido y transparente, basa riba competencia, pa nombramento den directiva di organismonan publico, move fondonan di gobierno for di e cuentanan na banconan comercial y cera nan, y reduci e cantidad di entidad publico, segun IMF.
“Sector priva di su banda mester capitalisa riba e medidanan fiscal aki pa aumenta inversion, y crea oportunidad nobo pa mehora inclusion financiero,” IMF a añadi.
Segun IMF, debe publico di Jamaica ta proyecta pa baha bao nivel di 100% di GDP pa prome biaha desde 2000 – 2001, te 98,7% e aña aki.
“Desempleo ta na e punto mas abao den historia, confiansa comercial ta halto, y economia ta calcula pa a crece 1,8% na 2018, a base di mineria, construccion y agricultura.
