(JamaicaObserver) – Minister di Informacion, Senador Dr. Dana Morris Dixon ta bisa cu Gobierno di Jamaica haci transicion pa modo di evaluacion y reparacion despues di e paso di horcan Beryl, cu a afecta e isla diaranson.

Minister Morris Dixon ta bisa cu gobierno a nota cu e aviso di horcan pa Jamaica a termina y ta agradecido cu e impacto di e sistema di tempo no tabata pio.

“Desafortunadamente, nos a haya reporte di un muhe cu a perde su bida na Hanover y un homber na Arnett Gardens na St. Andrew cu a bay den awa. Su status ta sin confirma. Nos ta sinti e dolor cu e famianan cu a wordo afecta,” Minister Morris Dixon a comenta den un declaracion diahuebs mainta.

E minister di Informacion ta bisa cu Gobierno ta consciente cu e horcan a causa confusion y daño significante den algun di e districtonan, den particular na e seccion zuid di e isla, cu ta inclui St. Elizabeth, Clarendon y Manchester.

El a apunta cu tin reporte di daño na propiedad y e red di caminda den parti di e isla unda na algun caminda autonan no por pasa.

Minister Morris Dixon ta bisa cu rapport preliminar ta cu algun hende a perde nan dak y te ayera mainta tempran tabatin miembronan di famia cu tabata preocupa cu nan no por a tuma contacto cu nan familiarnan na e costa di zuid, probablemente debi na retonan cu ta relaciona cu e red di telefon.

“Mi kier bisa na esunnan cu a sufri dañonan grandi cu Gobierno di Jamaica ta consciente di bo situacion y nos a haci transicion pa modo di evaluacion y reparacion. Durante e dianan binidero, nos lo continua nos evaluacion di e dañonan a traves di varios agencia, mientras cu nos ta busca pa contesta lo mas lihe posibel na esunnan cu tin mester di asistencia di emergencia,” Minister Morris Dixon a sigura.

Jamaica Public Service (JPS) ta bisa cu nan ta haci e evaluacion necesario pa restaura coriente na esunnan cu a perde conexion durante e pasada di horcan Beryl.

Diaranson e compania di luz y coriente a reporta cu no menos cu 65% di su clientenan tabata sin servicio.

Den un publicacion ariba nan pagina oficial di rednan social diahuebs mainta, JPS a bisa cu nan ta trahando pa restaura conexion lo mas lihe posibel y nan a pidi e clientenan pa tin pasenshi mientras nan ta realisa e trabounan di reparacion necesario.

“Pa por duna boso coriente for di e fuente, nos tin cu haci un evaluacion completo di e daño pa identifica unda e problema ta. E daño por ta riba un liña principal, cu por ta kilometernan leu for di unda bo ta,” su declaracion ta bisa. “Nos ekipo ta haciendo e evaluacion di e daño aworaki y lo completa e reparacionnan necesario pa bo por haya bo coriente back lo mas lihe y lo mas sigur posibel,” e compania di utilidad a bisa.