(JamaicaObserver) – Cu preocupacionnan cu ta sigui crece tocante salud mental, gobierno lo busca un intervencion solido pa apoya e problema aki cu ta afectando hopi persona rond di e pais.
Prome Minister, Andrew Holness, a haci e revelacion ey durante e di tres dia nacional di oracion anual celebra bao di e lema “Siña nos respet di berdad pa tur” na e National Arena di Kingston.
Mientras e tabata desea e lidernan di iglesia un feliz aña nobo, el a gradici Dios pa laga nos wak un otro aña mas di bida y el a reflexiona ariba esnan cu a perde nan bida.
“Semper e ta duel mi ora mi wak e reportahenan aki na unda un hende ta bisa: Mi ta bay caba cu bo bida y mi ta bay caba cu mi bida. Kico por a pasa nan cu nan a perde miedo di Dios pa respeta e bida di otro? Algo a bay robes,” el a bisa.
Su declaracion a bin un dia despues cu un pareha di Mandeville, Keith y Stephanie Ellis, a wordo haya morto di un presunto caso di homicidio-suicidio.
Aunke e Prome Minister a abstene di haci referencia specifico na e caso aki, el a bisa cu mas caso di personanan cu ta comete suicidio y ta kita bida di otro ta desaroyando.
“Gobierno lo busca un programa directo y lo delibera cu iglesianan pa tin un intervencion mas solido pa apoya e salud mental na e pais.”
El a señala cu den un di su discursonan anterior el a bisa cu aunke gobierno ta traha politica- y leynan, e tin e deber tambe di desaroya e curason di hende.
