Jamaica su servicionan gubernamental y sector priva mester bira mas productivo pa por ta mas competitivo, adoptando e velocidad di astro di atletismo Usain Bolt pa mehora transaccionnan economico, asina prome ministro Andrew Holness ta bisa.
Dunando discurso diahuebs na Caribbean Hotel Investment Conference and Operations Summit (CHICOS) na Montego Bay, Holness tabata contento cu Jamaica su ranking den e Global Competitiveness Report di 2018 – na posicion 71 entre 190 pais den haci negoshi y 79 di 140 den competitividad – cu a haci e pais cla pa inversion. Pero el a reconoce cu e pais lo mester haci mas pa atrae mas inversion.
“E no ta un ranking malo pa un pais na e fase di desaroyo manera Jamaica, pero e no ta suficiente pa promove e nivel di inversion cu nos ta buscando, asina ta cu nos no ta satisfecho cu esey,” Holness a bisa. “Jamaica mester bira e Usain Bolt di economianan chikito y den desaroyo, ora ta papia di facilidad pa haci negoshi y di facilitacion di negoshi.”
Aunke e pais ta score halto den facilidad pa habri un negoshi, empresarionan ta lamenta cu burocracia ta obstaculisa transaccion y proceso, manera pa aproba licencia cu ta stroba productividad.
Pa mehora tur esaki, gobierno tin un task force pa facilita comercio, cu ta señala y haci proposicion pa elimina obstaculo inncesario cu ta stroba crecemento economico. Esaki ta inclui loke ta yama e ‘Jamaica Single Window For Trade’ (JSWFT), cu entre otro ta apoya e sistema automatisa pa aduana, cu ta opera a base di e programa ASYCUDA (mescos na Aruba; red.). Tambe ta elaborando riba un sistema digitalisa di cinco pilar pa turismo identifica pa diversifica e sector aki.
