Cuatro luna despues cu un di e avionnan Boeing 757 di Fly Jamaica Airways, cu 118 pasahero y ocho miembro di tripulacion, a crash den aterisahe na aeropuerto Cheddi Jagan di Guyana, e aerolinea cu base na Jamaica a stop di bula.
Pasaheronan di e vuelo pa Toronto, 82 di nan Canades, a cuminsa un proceso di daño y perhuicio contra e aerolinea alegando lesion fisico y perdida di propiedad.
Den un notificacion publico na december 2018 e aerolinea a declara na e pasaheronan cu nan lo ta trahando estrechamente cu autoridadnan pa identifica causa di e accidente y a sigura cu nan ta sigui atende bienestar di e pasaheronan.
Sinembargo, den un carta di 29 di maart ultimo, presidente y CEO Paul Ronald Reece, a bisa cu pa falta di avion y e impacto cu esaki ta haci riba posicion financiero di e compania, no tin otro alternativa cu retira tur personal, efectivo desde 31 di maart ultimo.
Fly Jamaica Airways tabatin vuelo directo entre Guyana y Jamaica, New York, y Canada. Cu Fly Jamaica for di escenario den region, atencion ta bay awor na e problemanan financiero y operacional cu LIAT (Leeward Islands Air Transport) tin, cu ta rekeri busca fondo di emergencia di US$ 5,4 miyon y trata di logra un plan di restructuracion hunto cu Caribbean Development Bank (CDB).
