Gobierno di Jamaica a declara un estado di emergencia na districto di St James, despues di un serie di incidente di tiramento.
Ministerio di Asunto Exterior a pidi turistanan Britanico pa keda dentro di e instalacionnan di nan hotelnan ya cu tin un “operacion militar mayor” ta tumando luga. Tin como 200.000 turista di Gran Britania ta bishita Jamaica tur aña.
Un vocero di Asunto Exterior a bisa cu turistanan mester sigui instruccion duna localmente incluyendo restriccion den cierto sectornan, y mester ta particularmente cuidadoso anochi.
Prome ministro Andrew Holness a bisa cu e estado di emergencia tabata necesario pa reestablece siguridad publico den e area di St James. Meta ta pa actua contra bandanan criminal, cu ta responsabel pa asesinato,trafico di arma y extorsion.
Segun e corant the Gleaner tabatin 335 asesinato den e districto di St James na 2017.
Tambe ta calcula cu tabatin 38 asesinato na Jamaica den e prome seis dianan di 2018, compara cu 23 aña pasa.
Como cu ministerio di Asunto Exterior di Reino Uni no a emiti advertencia encuanto biahe pa Jamaica, e agencianan di biahe no tin obligacion di ofrece cliente un destinacion alternativo.
Sean Tipton, di e Asociacion di Agencia di Biahe Britanico, a bisa cu hotelnan na Montego Bay tin siguridad masha estricto loke ta implica cu turistanan por sinti nan mes sigur. El a bisa BBC: “Si bo mira e incidentenan cu a tuma luga, nan tur tabata dirigi contra hende local. Esey obviamente ta teribel pa nan, pero den sentido di incidente cu ta afecta turista, mi tin basta tempo sin mira algo asina na Jamaica.”
El a enfatisa tambe e importancia di sigui conseho di tour operadornan y di ministerio di Asunto Exterior, y di no sali di e resort a menos cu ta pa un excursion organisa.
