Ayera durante un conferencia di prensa di Directie Infrastructuur en Planning (DIP), a keda conoci cu na aña 2018 tabatin un cantidad di peticion pa viviendanan di erfpacht, cu un total di 14.700 peticion cu ta wardando desde 1990.

Haime Croes, Director di DIP a bisa cu hende mester mira esaki den un contexto mas amplio, pa motibo cu nan como DIP no ta papia di reto di tereno; pero loke nan ta haci ta pone na nivel cu nan ta papiando di un problema di vivienda na Aruba.

E problematica cu e isla tin awor ta vivienda, segun Croes a manifesta, pa via cu e cantidad di hendenan cu kier un vivienda ta basta grandi. Den e cuadro ey el a comenta cu nan ta bay hiba un maneho di dos banda. Di un parti nan ta bay haci inslag ariba e cantidad di hendenan cu a pidi tereno y di otro banda, nan ta pronostica cu a base di futuro y cifra na unda nan por bay pa 2025.

Den e parti ey, Croes a declara cu nan ta bezig cu ROP y ROPV y esey ta e dos trayectonan cu nan ta cana. Pa e motibo aki, el a anuncia cu pa 15 di november nan a yega na trata e peticionnan di aña 2012, na unda cu e hendenan por haya nan pre-reservacion.

Croes a indica cu esaki ta hopi importante pa nan, den sentido cu ta hopi peticion cu e hendenan a haci, casi 7.400 peticion pa yega na 2012 y nan ta bay te 2019 cu e mesun cantidad ainda pa logra. Pero e diferencia ta cu nan tin cu bay pa 7 aña y e idea ta keda cu nan por yega te 2019 mirando e aspecto con nan ta trahando pa ‘clear up’ tur loke ta e peticion cu tin.

Di mesun manera, Croes a informa cu pa januari nan tin cu anuncia un maneho nobo, pa motibo cu ta importante analisa cifranan.

Di e 7.400 peticion, Croes a comenta cu mas o menos 3.500 hende ta bay pa pre-reservacion, loke ta nifica cu un parti di 4.000 hende no ta bay pa remarca, pa motibo cu nan a fayece, e persona no ta bibando na Aruba y hopi di nan tin cas caba. 3.500 hende cu ta resta a bay remarca pa loke ta trata cas.

El a haya importante pa bisa cu di e 3.500 persona ey, un 40% ta manda pa bay FCCA, mirando e edad y cu nan no ta cumpli cu e reglanan. Loke a resta ta 2.100 cu ya caba ta bezig cu reservacion y tur loke ta pa traha cas y asina nan por yega mas lihe na su cas.

Pa otro aña nan tin planea di tin 7.000 peticion mas, cu hendenan hoben cu ta bin mas aden y e reto a bira mas hopi, pero loke el a señala mas importante ta loke nan ta espera despues di 2019, a base di proyeccion cu nan a haci, hunto cu un cooperacion cu ROPV nan tin un comision trahando riba vivienda y e parti ey ta mustra cu nan tin 47.000 hogar y nan ta espera un crecemento pa 2025 extra di 2.500 hende cu mester di cas den e 5 aña ey.

Teniendo esaki na cuenta, Aruba no ta bay bira mas grandi, tin hopi presion pa tereno. Aworaki nan tin un lista cla pa tur hende di aña 2012 y awor nan ta bezig tambe pa e parti di tereno pa esunnan cu ta bin aworaki.

P’esey, Croes a bisa cu nan ta dirigi nan maneho ariba terenonan mas chikito, mirando tambe e cifranan na unda cu Censo ta bisa cu dia pa dia hopi hende ta bay pa e parti di menos famia, hopi hende ta biba hunto den un cas y tur esey ta mustra mas demanda.

“Henter e parti demografico cu nos ta mirando a base di cifra, e parti di bay ariba ta bay ta necesario” Croes a declara, referiendo na construccion vertical.

E parti di apartamento a crece grandi y esey ta pone tambe cu tin cu adapta e maneho di vivienda, cu tambe tabata dirigi ariba un maneho integral. Un maneho na unda tur hende ta haya un cas accesibel, aunke prijsnan a subi y automaticamente tin cu limita e cantidad grandi di tereno y tin cu bay ariba.

Richenella Wever, tour coordinador, a menciona cu nan ta yegando na e ultimo grupo pa aña 2019 pa loke ta trata pre-reservacion. E biaha aki nan ta bay trata esunnan cu a yega na remarca y cu a haci peticion na añanan 2010, 2011 y 2012.

Otro siman, cada persona cu a yega na remarca lo ta ricibi un carta di invitacion pa e dia di informacion 15 di november proximo na Club Caquetio. Wever a bisa cu e dia ey, DIP lo splica loke ta bay pasa den momento cu nan haya nan pre-reservacion y siguiente pasonan cu tin cu sigui na e momentonan cu nan ta haya e derecho pa construccion di cas.

Ta un total 892 persona cu a yega na remarca segun Wever a splica. El a haci un yamada pa tur persona cu a haci un peticion den añanan ey pa ta pendiente di e carta cu nan lo ricibi cu e adres cu nan tin registra na Censo.