Riba 1 di september tur aña na hopi parti di mundo ta celebra Dia di Prensa. Aki na Aruba esey no ta diferente. Nos por celebra e echo cu den nos pais nos por bisa cu en general nos ta gosa di un prensa liber. Esey no ta e caso den hopi pais, specialmente esunnan unda tin conflicto arma grandi tumando luga.
Den e paisnan ey, e profesion di periodista por ta casi un sentencia di morto. Na un manera mas scondi tambe den hopi otro pais tin caso di intimidacion y violencia contra prensa, sigur contra esnan cu ta trata di trece e berdad dilanti. Felizmente den nos pais esey no ta asina y nos mester ta agradecido pa esey y percura tambe pa e keda asina, pa prensa por sigui haci su trabao den pleno libertad.
Cifranan Internacional
Ta oportuno trece algun cifranan lamentabel tocante e consecuencia fatal cu por trece e trabou di un periodista eherciendo su labor di informa pueblo di un manera obhetivo of simplemente di mustra e noticia con cu ta sin ningun tipo di temor riba e reaccion politica of concepto di esunnan cu simplemente ta pensa diferente.
Segun Federacion Internacional di Periodistanan (FIP), un total di 1100 periodista a wordo asesina eherciendo su profesion den e ultimo 12 añanan. E cifra lamentabel aki ta exclui esunnan cu a bira victima pa otro tipo di maltrato. Miles di periodistanan rond mundo a sufri e violacion di un di e derechonan humano mas importante , esta, libertad. Pa haci uzo di e valioso libertad aki, nan a wordo menasa, bati y hasta secuestra. Esaki sin menciona e diferente atentado contra infrastructura di diferente medio di comunicacion, stigmatisacion y obstruccion di trabou periodistico.
E cifranan aki ta ilustra con na un epoca unda e medionan di comunicacion ta mas poderoso y e hende tin mayor acceso na diferente fuentenan di informacion, e periodista cu tin e balor y e boluntad di bisa e berdad ta enfrenta riesgonan cada bes mas grandi” asina secretario general di FIP, Philippe Leruth, a bisa.
Segun FIP, ultimo aña, Pakistan a bira e luga mas peligroso na mundo pa eherce e periodismo cu 16 persona asesina. Mexico y Honduras tin caba 10 periodista asesina. FIP, ta critica ademas e castigo of falta di ley di castigo pa enfrenta e problematica aki haciendo un yamada urgente pa autoridad competente por tuma e atakenan na e prensa na serio y por actua di manera creibel pa castiga e culpabel.
Aruba
Ainda na Aruba tin e privilegio di eherce un periodismo sin temor di perde e bida di un manera absurdo simplemente pa bisa e berdad. Sinembargo e enfoke di e periodismo local ta mas tanto informativo. Esaki kiermen cu den e mayoria di e casonan, simplemente, ta wordo publica diferente comunicadonan pa cumpli cu e obhetivo di duna un espacio na tur esunnan cu kier expresa nan pensamento. Pero lamentablemente, un di e obhetivo principal di un medio di comunicacion cu ta actua como un brug entre pueblo y gobierno ta disparciendo na Aruba.
E funcion social di un medio di comunicacion
Actua como medio of brug ta sin duda e servicio mas grandi y valioso cu un medio di comunicacion por ofrece. Esaki ta encera mustra e realidad di bida di un pueblo cu hopi biaha no tin bos of no ta dispuesto riba su mes pa grita un gobierno cu e ta existi y cu e tin cos di bisa y reclama. Esaki mester ta un servicio y no un tarea cu ta haya recompensa monetario of di reconocimento.
Hopi biaha gobierno no sa kico e pueblo tin mester realmente, kico nan ta pensa, kico nan ta spera. Ta akinan unda e medio di comunicacion mester actua y mustra a traves di palabranan cu argumento, historia di bida, potretnan, siguimento di casonan, etc. e realidad di un pueblo cu simplemente ta busca un solucion na nan problemanan.
E berdadero funcion di un periodista, ta un funcion unico y valioso di representa pueblo, informa pueblo y duna pueblo e hermentnan necesario pa nan por descubri e berdad, opina cu argumentonan y haci uzo di su libertad di pensamento y su capacidad di interpretacion pa tuma decisionnan importante.
Eherce e funcion aki ainda ta posibel na Aruba. Un funcion social cu simplemente kier yuda pueblo enfrenta nan realidad y bisa gobierno cu pueblo t’ey. Pa e motibo aki, e funcion mester bay mas leu di un funcion netamente informativo sino un funcion cu ta duna periodista e poder y e recompensa mas valioso di haya sa cu a traves di su trabou por yuda un pueblo sin bos.
Bon Dia Aruba ta traha dia pa dia pa duna pueblo di Aruba un corant di calidad halto, obhetivo y independiente y lo sigui lucha pa duna un espacio sin condicion pa tur esunnan cu kier mustra e realidad cu responsabilidad y cu argumentonan valido. Segun Albert Camus, “Prensa liber por bira un prensa di bon calidad of un prensa di mal calidad, pero sin libertad, e prensa unicamente lo bira un prensa di mal calidad”
