Trabou di prensa tur dia ta blanco di critica di e comunidad. Esey no ta nada otro cu e refleho di importancia cu e rol di prensa ta hunga den un comunidad. Prensa tin e rol di informa pueblo. Den e desaroyo di e papel ey tambe e ta duna formacion na e pueblo, y ta stimula un discusion positivo den un comunidad. Pa por cumpli cu e meta ey e miembro di prensa mes mester tin un dosis di formacion amplio y un conocemento general di historia, cultura, economia etc. Y ta sigui e desaroyo di su comunidad tumando un posicion critico responsabel. Esaki completamente los di su escogencia y gusto politico.
Tin desaroyo
Mester bisa cu ultimo añanan nos no ta mira por ehemplo tanto caso di potretnan excesivo di accidente di auto y otro calamidad, faltando respet na e victima y su familiarnan. Tambe ta mira cu ta respeta identidad di personal di cuerponan uniforma cu ta haciendo nan trabao y cu no ta faborece cu exposicion exagera. Den esey sigur tabatin un avance, cu mester bisa a ser logra sin intervencion di un organismo di supervision di etica riba nos prensa.
Sinembargo, esey no a haci cu e discusion y critica riba prensa a disparce por completo. Tempo, tempo ta bin critica riba prensa pa motibo di un of otro incidente cu realmente no tabatin mester di sucede, pero esey no ta motibo di recori na un supervision aheno cu probablemente tampoco lo ta liber di influencia politico?
E beneficionan lo ta mas grandi si habri e oportunidad riba un nivel intermedio y academico pa traha riba formacion di hobennan pa haci un estudio riba e nivel periodistico den nan propio pais cu nan propio realidad. Pa cu esaki no mester intervencion di gobernacion, di ningun color. Cu e principionan di bon periodismo bon describi entre otro den e Declaracion di Federacion Internacional di Periodismo, lo mester ta suficiente pa duna un bon descripcion di e curiculo di e scol di prensa den su diferente faceta.
Comercio y prensa
Ta keda un otro factor importante cu por tin influencia riba un prensa independiente y esey ta bin di e partnernan comercial di peso. Mas di un biaha prensa ta confronta cu empresarionan cu ta menasa di retira nan avisonan ora sali algun noticia cu por ta desfaborabel pa nan empresa of nan no ta di acuerdo cu e maneho di e redaccion. Den un luga chikito manera Aruba unda ta hopi dificil pa opera den forma anonimo e ta keda un problema cu obhetividad ta topa cu e limitenan cu relacion personal por impone riba trabao di prensa. Mientras nos no ta biba den un mundo perfecto, ta keda importante pa prensa trata na duna informacion mas completo posibel, manteniendo obhetividad y absteniendo di atake personal, pero tambe luchando pa autonomia di redaccion di tur medio di comunicacion.
Pa nos por duna un contesta valioso na e fenomeno ey atrobe nos ta enfatisa cu un formacion periodistico denter di nos cuadra cultural por duna e miho contesta na e problema aki cu ta saca su cabes den nos mundo periodistico. Aki nos ta reconoce e falta di formacion cu por ta un di e causanan tambe di un conflicto cu e mundo comercial, di cual nos existencia ta depende di dje.
Calidad di informacion
Esaki ta un tereno unda nos mester por avansa sigur. Desde cu internet a cambia mundo, tin hopi mas informacion disponibel, no solamente pa periodista sino pa cualkier persona cu tin acceso. Esey ta implica tambe cu un periodista mester ta consciente cu e publico por ta na haltura di hopi mas detaye cu antes y como prensa bo no por bin dilanti como esun menos bon informa cu e publico en general.
Tur persona bon informa ta logra haya informacion digital tur dia, pero e ciudadano cu no ta asina avansa ainda cu uzo di internet ta keda perhudica cu informacion parcial y hasta incorecto. Aki ta unda tin un tarea pa prensa en general pa no solamente ripiti opinion di un cierto persona, pero pa haci un esfuerso extra pa yega na informacion completo. Cu tanto informacion disponibel, no ta solamente un cuestion di loke si ta publica, pero tambe di evalua loke no ta publica. Tur esey di un banda ta haci e tarea di un periodista hopi mas complica, pero tambe hopi mas interesante. Importante ta pa mantene un mente habri pa tur loke ta bin den direccion di e periodista y haci un escogencia ekilibra.
Nos ta kere cu atrobe ta den un formacion organisa curicular por duna contesta concreto na e fenomenonan ey. Ta p’esey nos ta kere cu realmente a bira tempo pa habri e posibilidad di formacion ey den nos sistema educativo sea cu un comienso riba e nivel intermedio (EPI) y tambe finalmente riba e nivel universitario.
Na tur colega di henter prensa di Aruba un feliz y fructifero Dia di Prensa 2016.
