Cu nan matrimonio bou scrutinio di rednan social, Jada Pinkett Smith y Will Smith a reafirma nan compromiso na otro, mientras Pinkett Smith a admiti di tin un relacion cu musico August Alsina tempo cu e y Smith tabata separa.
Den un combersacion personal diabierna den e serie di Pinkett Smith, Red Table Talk, el a bisa cu e tabata duda riba discuti comentarionan atribui na Alsina pa motibo di speculacion publico cu esakinan a provoca.
Loke a cuminsa como un amistad y un esfuerso di famia pa yuda Alsina cu su salud alrededor di cuatro aña pasa, a converti den ‘un sorto di relacion diferente’ na un momento den cual e y Smith a kere cu nan matrimonio tabata termina, Pinkett Smith a bisa.
“Si, e tabata un relacion. Absolutamente. Ami tabatin hopi dolor. Mi tabata hopi kibra. Den e proceso di e relacion ey, definitivamente mi a realisa cu bo no por haya felicidad pafo di bo mes… Definitivamente mi lo bisa cu nos a haci tur loke nos por pa bay leu di otro, unicamente pa haya sa cu esey no ta posibel.”
Na dado momento den e combersacion, nan a echo otro, bisando: “Nos ta cana hunto. Nos ta muri hunto. Mal matrimonio pa bida largo”, un alusion na e frase popular di e frankisia ‘Bad Boys’ di Smith.
E pareha ta casa desde 1997 y tin dos yiu, Jaden y Willow. Cada un tabata mustra incomodo durante varios momento.
Pinkett Smith, kende a aparece den dos pelicula ‘Matrix’, a cuestiona pakico Alsina lo trece e episodio dilanti atrobe, bisando cu el a termina comunicacion cune. E tambe a rechasa e idea cu Smith a dun’e permiso pa e relacion. Alsina a bisa den un entrevista cu e actor a duna su ‘bendicion’.
“E unico persona cu por duna permiso den e circunstancia particular ey ta ami mes”, Pinkett Smith a bisa. “Mi por bira con e lo percibi esaki como permiso, pasobra nos tabata separa amistosamente. Y mi ta kere e tambe kier a laga na cla cu e no a kibra un famia, pasobra e no a”, el a bisa.
