Hospital Dr. Horacio E. Oduber a haci un conferencia di prensa pa duna di conoce e situacion cu nan ta presentando na e momentonan aki.
Voozitter Raad van Bestuur Jacco Vroegop a expresa cu te ayera nan tabatin 34 pashent den hospital, cu ta positivo pa Covid-19, di esakinan 12 ta den unidad di cuido intensivo (ICU) ,unda ademas tin otro tres pashent cu no tin Covid-19, pa loke tin 15 persona den ICU.
“Nos tin capacidad pa 18 pashent, pues nos tin tres cama disponibel. For di mañan te cu fin di siman nos ta anticipa cu lo bin un cantidad di pashent y nos por yega na nos capacidad, cada pashent di ICU ta rekeri capacidad enorme di nos profesionalnan di cuido. Nan tin mester di un enfermero pa cada pashent.”
Ademas, Vroegop a sigura cu den piso di Covid tin 22 pashent positivo y nan tin e capacidad hasta 35 pashent, despues di esey lo mester habri espacio pa otro pashent y lo mester pospone operacion, “esaki ta algo cu nos kier preveni”, el a comenta.
El a recorda cu si un persona a vacuna esey no ta nifica cu no por wordo contagia y sigui contagia otronan, pa e motibo aki “mester cumpli cu tur regla” Vroegop a declara.
Tambe e ta bisa cu maske tin rumornan andando cu e ola aki ta mas mortal, nan no a mira mas caso di morto. “Ainda nos ta memey di e tercer ola, dus no por bisa ainda si e ta mas mortal, pero te awo e ta igual cu e segundo ola, loke si a mira den e tercer ola ta cu hende ta bin hospital mas laat, y pa e motibo aki mester duna oxigeno of intuba mas trempan”, Vroegop a informa.
“Actualmente tin 2 miembro di personal di hospital den cuarentena activo cu Covid, y 6 persona den cuarentena preventivo, maske no ta positivo”, Vroegop a bisa.
