E jaarverslag di Ministerio Publico pa 2022 tin varios dato interesante, pero tambe tin algun tendencia cu ta destaca, y den esaki, un di esnan mas impactante ta e aumento den incidentenan cu arma di candela. Den nos edicion anterior, Bon Dia Aruba a trece dilanti con posesion di arma ta un di e delitonan mas comun entre menornan di edad. Pero e jaarverslag ta destaca tambe cu tabatin mas incidente di delito involucrando arma di candela na 2022 compara cu 2021.

Delito di arma di candela

Segun e jaarverslag di OM, na 2022 tabatin un total di 131 ofensa di arma, compara cu 84 na 2021. Sinembargo, na 2021 tabatin un caso di importacion ilegal di arma sin permiso, mientras cu na 2022 no tabatin ningun.

Tabatin un aumento den e cantidad di incidente cu arma di candela na 2022. Ministerio Publico (OM) y polis a anuncia nan maneho intensifica pa cu posesion di arma di candela durante un conferencia di prensa dia 29 di juli 2022, manera declara pa Procurador General (PG) y hefe di polis.

Estadisticanan di polis ta mustra un aumento den ocurencia di posesion di arma entre hendenan jong. Departamento di Polis (KPA) a realisa varios investigacion riba incidentenan reporta di tiramento. Adicionalmente tabatin incidentenan cu no a keda reporta pero si a keda treci dilanti informalmente cerca polis.

For di november 2022 te dia 28 di december 2022, OM y KPA a inicia un campaña di colecta di arma di candela, cu dos container posiciona na wardanan di polis na Oranjestad y San Nicolas.

Delito di droga

Na 2022 tabatin 528 delito di droga compara cu 723 na 2021. Di e delitonan di droga na 2022, 173 tabata involucra hard drugs, 317 soft drugs, 20 preparacion, 11 cultivo di marihuana, y 7 tabata rapport di drugkoerier.

Team di drugspanden a haci varios inval na varios sitio y propiedadnan pa gara bendedornan y confisca droga. Benta riba caya y benta for di e propiedad y residencianan aki a crea disturbionan significante pa residentenan local. A destrui un cantidad considerable di mata di marihuana, y a stop preparacionnan pa comete delitonan di droga. Como resultado, a procesa 35 caso di droga conduciendo na aresto di 29 bendedor den total.

A confisca e siguiente cantidadnan di droga:

Cocaina: 496.7 gram.

Marihuana: 1787 gram.
Mata di marihuaha: 339 mata.

Pildo di XTC: 34 pildo.

E narcoticonan confisca a keda destrui. Adicionalmente, a confisca un total di 46,735.60 florin y 4,472 dollar. Tambe a confisca un arma di candela durante e operacionnan aki.

Delito di trafico

Compara cu 2021, na 2022 tabatin mas delito relaciona cu trafico, esta 1174 na 2022 compara cu 883 na 2021. Sinembargo, na 2022 tabatin menos violacion di trafico (5418) compara cu 2021 (7394.) OM ta aclaria cu e tabel ta mustra e cantidad di delito di trafico, pero un sospechoso por a comete varios delito.

Di e delitonan di trafico cometi na 2022, 395 tabata core bao influencia; 716 tabata core sin rijbewijs; y 14 tabata accidente fatal di trafico. E cantidad di accidente fatal na 2022 tabata dobel (14) cu na 2021 (7).

E cantidad di rapport di polis cu a trata den corte (p-nummer) y no e cantidad di sospechoso, tabata 3588. Un solo sospechoso por tin varios p-nummer asocia cu nan cu a trata simultaneamente den corte.

Fin di 2022 a haci un start cu e programa nobo di software “Paga Bo Boet” (PBB). E programa nobo ainda tabata den fase di testing na 2022 y esey a continua te maart di 2023, ora e fase di implementacion tabata spera di cuminsa. Adicionalmente, Departamento di Polis y Ministerio Publico a cuminsa usa e oproepings-processen-verbaal (opv) nobo. Esaki ta nifica cu awo ta entrega menos rapport di violacion di trafico na OM. E opv ya ta indica e fecha di audiencia den corte. Esaki tin e bentaha cu e ta cita e sospechoso inmediatamente presencialmente pa un fecha specifico den corte y e sa mesora ki violacionnan ta involura. Pa e team PBB, esaki ta nificac u e procesamento administrativo di e casonan aki ta bay ta mas lihe.

Apelacion y cassatie: Casonan criminal den apelacion

Na 2022 tabatin 93 caso den apelacion compara cu 98 na 2022, incluyendo casonan retira. Di e 93 caso di apelacion na 2022, 30 tabata contra detencion prome cu huicio, y 63 tabata contra sentencia.

Na 2022 tabatin 19 caso criminal den cassatie compara cu 7 na 2021 (1 a keda retira).

Tambe OM a informa di solicitudnan pa extradicion na 2022, indicando cu Ministerio Publico a ricibi un solicitud di extradicion, pero no por a procesa esaki pasobra a entrega e solicitud incompletamente. OM tabata warda pa mira si lo bolbe entrega e solicitud.