Sra. Ivy Simon-Hernandez no ta un persona desconoci den comunidad, sobre todo pa su trabao como presidente di Quota Club pa temporada 2023-2024. Den un entrevista cu Bon Dia Aruba, Sra. Simon ta conta di su trayectoria cu Quota Club, e logronan di e club durante su temporada como presidente y tambe retonan cu nan ta enfrenta.

“Mi ta casa cu Mark Simon y tin 2 yiu muher, Ichelle (35) y Ivelisse (29)”, Simon-Hernandez ta conta. “Mi ta Oma di un prinses Dennise (8) y un prins Raeon di 7 luna. Mi a termina Maria College Mavo basta jong cu mi 17 aña, y mi a bay pa un vakantie job na Island Finance, y te dia di awe mi ta trahando cu Island Finance.”

Ademas, Simon-Hernandez ta conta cu semper el a keda studia. “Despues cu mi a cuminsa traha mi a sigui varios curso a traves di añanan pa mantene mi al dia y sigui studia. Mi a cuminsa como Branch Representative y awendia mi ta Managing Director di Island Finance. Dia 26 di mei 2024 lo mi cumpli 43 aña den servicio di Island Finance. Mi ta gusta hike, mi ta forma parti di Movimiento ta Bida y nos ta hike diferente parti di Aruba tur diasabra mainta 6or y ta traha boluntario na Misa Catolico na Oranjestad.”

Ademas, Simon-Hernandez tin un trayectoria largo cu Quota. “Mi a join Quota dia 1 maart 2007. Mi a cumpli 17 aña di ta miembro activo di Quota. Mi a sirbi board 13 biaha, den diferente posicion y tres biaha como presidente di e club. Na momento cu Quota a acerca mi, mi a bisa mi casa cu awor mi yiunan a bira grandi ta tempo pa mi por cuminsa traha pa comunidad, bisa danki pa tur locual mi a logra.”

Bon Dia Aruba a puntra Simon-Hernandez, como presidente di Quota Club 2023-2024, kico ta algun di e retonan cu a encontra y kico ta algun di e logronan?

“E logo di e aña aki ta “Quota siribiendo comunidad cu curazon”. Na cuminsamento di e aña como presidente mi a pone algun reto. Un di nan ta pa nos trece algun miembro hoben y nobo pa nos club, no menos cu 5 miembro nobo y awe nos por bisa nos a logra 15 miembro nobo durante e aña. Nos tabata tin e proyecto yama “Speed Light” cual proyecto a wordo lansa na St. Paulus School na San Nicolas. E ta un proyecto cu e meneer of juffrouw di klas por usa pa nivela e zonido den e klas sin cu tin cu halsa su bos. Nos tabatin nos evento di fundraising na november, cual tabata uno exitoso y durante temporada di carnaval nos ta conscientisa e comunidad ariba e cuido di Oido, dunando charlanan na schoolnan y nos ta bende earplugs durante paradanan di carnaval. E suma colecta di fundraising y esun di earplugs ta bay bek pa nos comunidad. E aña aki nos lo tin e bunita suma di Afls. 100 mil florin pa duna bek na nos comunidad den luna di April 2024. Quota ta bishita nos muchanan na Ortho Pedagogishe Center pa entre otro cambia actividad cu nan.”

 

El a splica cu “Quota Club ta un organisacion cu ta consisti solamente di hende muher, hende muher cu un posicion den nan profesion. Quota ta dedica principalmente na e cuido di oido y reenforsa proyecto di hende muher y muchanan den dificultad. Quota ta duna charlanan na school durante temporada di carnaval. Quota ta traha cu muchanan y hende grandi den proyectonan special.”

E pasion di Simon-Hernandez pa boluntarismo no ta caba na Quota Club, sinembargo, ya cu e tambe ta activo den otro fundacionnan. “Mi ta miembro activo di FEPOH y tin e posicion di Vice President. Mi ta forma parti di Fundacion Movimiento ta bida, como un di e leadernan. Mi ta traha boluntario na misa Pro Catedral San Francisco di Asis. Mi ta un Ministro di Eucaristia. Mi ta lesa lectura, parti comunion y yuda misa. Tambe un bes pa luna ta hiba comunion pa nos grandinan na cas.”

Por ultimo, un mensahe di parti di Sra. Simon pa comunidad di Aruba: “Tempo ta pasa asina lihe awendia. Comparti cu famia, yuda comunidad asina cu tin un tempo. Traha cu amor y cu curason y tur cos ta bay bon.”