Den dianan aki, Aruba a presencia e problematica di adiccion di droga. Hende cu ta biba riba caya cu no tin otro luga pa bay, esunnan cu mester di un ayudo pa sali for di e bida ey y por tin un segundo chens. Pero e problematica cada dia ta birando mas dificil, tanto pa autoridadnan concerni como pa organisacionnan cu dia pa dia ta den e lucha aki.

Ivone Simon, presidente fundacion Adult & Teen Challenge Aruba, a splica cu nan ta un fundacion cu ta existi rond di mundo pa 60 aña caba. Nan meta principal ta pa lanta centronan di rehabilitacion pa personanan cu problema di adiccion.

Adiccion no ta solamente droga cu alcohol so, esaki tambe tin di haber cu un emocion cu ta controla e bida di e persona y den e programa di e fundacion, Simon a bisa cu nan ta siña e personanan cu por tuma e control bek.

Den mayoria di casonan di Adult & Teen Challenge rond di mundo nan ta trata parti di adiccion pa droganan, alcohol y tambe depresion, cu ta cay den number 3 di e programa mundial. E problemanan aki ta origina for di problemanan social, emocional, cu no necesariamente tin di haber cu alcohol y droga, pero cu depresion ta hiba nan pa uza e substancianan aki pa lubida e situacion y na final no ta resolve nada.

Tambe, Simon a comenta cu nan tin e parti preventivo unda cu nan ta coach e famianan of tur persona cu ta envolvi directamente cu e persona cu a drenta den e programa – kende nan ta yama studiante y ora nan ta gradua nan ta un graduado di Adult &Teen Challenge su programa.

Mientras e proceso aki ta na caminda, e fundacion ta prepara e famianan pa por ricibi e persona, duna nan confiansa bek, pa motibo cu e impacto ta basta grandi pa e seno familiar.

Na e momentonan aki, Simon a manifesta cu ta existi diferente fundacionnan cu e mesun meta, esta di por yuda esunnan cu problema di adiccion. Tanto Adult & Teen Challenge y Fundacion Adopt un Adict nan ta enfoca aworaki pa manda e personanan afo cu e programa, pasobra nan ta bay habri nan centro di rehabilitacion pronto, pero ta falta personal certifica.

Normalmente e studiantenan ta prepara despues cu nan ta gradua y nan ta haya certificacion pa bira parti di e personal di e fundacion. Nan ta trahando riba e meta pa nan por crea nan mesun profesionalnan cu no a ‘give up’ durante e programa. Si nan tin caracteristica pa liderazgo cu despues por yuda otro persona cu ta drenta den e centro y pasa e proceso cu nan, esey ta haci e programa mundialmente hopi exitoso.

Den un comunidad asina, Simon a declara cu nan mester di colaboracion cu Gobierno, por ehempel, den e preparacion cu e personanan afecta por bay pa centronan cu Gobierno ta maneha. Aina mes el a comenta cu hopi biaha nan ta haya yamadanan cu e fundacion mes no por aloca e persona afecta, pero cu tin disponibilidad den e centronan cu ta subsidia door di Gobierno.

Aruba tin un escasez grandi di profesionalnan den area aki, no necesariamente cu estudio, sino cu curason y pasion pa traha den esaki.

P’esey varios fundacion ta pidi un colaboracion estrecho cu instancianan di Gobierno y asina tambe crea un respet y disciplina den e forma total di maneho. Por ehempel ta existi hende cu problemanan mental kende por manda pa Respaldo, pero esey ta algo cu e profesionalnan ta haci, pa e motibo aki ‘nos mester traha hunto, pero tambe e comunidad mester traha cu nos’, Simon a expresa.

Pa e motibo aki, nan a reuni pa vocifera nan preocupacion y loke nan kier haci ta pa yega conhuntamente cu e ministerionan di Salud, Asuntonan Social y Husticia pa por logra un impacto hopi lihe den e forma con ta wordo maneha aki na Aruba.

Segun Simon, un adicto a bis’e cu e programa a bira cu mas disciplina, pero no tin control riba nan, no tin consecuencia pa e actonan di nan. Nan ta horta pero dos dia despues nan ta sali liber, hopi biaha nan ta horta cu intencion di bay KIA, pa motibo cu eynan nan tin cuminda y un luga pa drumi.

“Loke nos kier ta pa gobernantenan pone mas atencion, e problema aki no por sigui mas” Simon a declara.

Esaki ta un situacion cu ta afecta hopi mes e pais. Adictonan ta hortando turistanan, hende local, pa nan por yega na placa pa satisface nan adiccion y e ora ey esaki ta bira problema di ladronicia cu cada dia e cifra ta birando mas halto.

Aworaki, e lidernan di e fundacion ta pidiendo un reunion urgente cu e gobernantenan pa asina busca un solucion y traha cu loke nan tin actualmente. Pa e motibo aki nan ta pidi colaboracion cu e personanan di centro Sero Colorado por ehempel, pa motibo cu nan tin e espacio pa por tuma 80 persona aproximadamente pa yuda haci un impacto positivo.