Ayera 1 di october, tabata e Dia Internacional di Adulto Mayor caminda Organisacion di Pensionado Publico di Aruba (OPPA) a tene un actividad special pa asina reconoce un grupo di persona di 80 aña, sinembargo, e dia aki manera Valdes a menciona, no tabata pa celebra sino pa trece dilanti tur loke mester ser haci pa nos grandinan.

Desde cu su persona a fungi como presidente di OPPA el a ripara cu gobierno y comunidad no ta realisa cu tin un envehecimento formal ta tumando luga y “lamentablemente Aruba no ta provee un miho bida pa nos grandinan. Esey ta un lucha cu nos ta sigui hiba,” el a bisa.

Pa esaki, el a splica cu el a skirbi diferente carta na prome minister Evelyn Wever-Croes y tambe na minister encarga cu Asuntonan di Adulto Mayor, Ursell Arends, pa asina keda insisti pa un Foro Nacional di Adulto Mayor.

Den e foro aki diferente gremio a haci nan presentacion y a trece dilanti tur loke ta sucediendo bao di e grandinan manera lista di spera pa dokter, lista di spera pa specialista, luga di keda, etc.

Den e segundo edicion di Foro di Adulto Mayor cu a tuma luga na maart ultimo segun loke Valdes ta bisa, “nos a kere cu ta bin cu solucionnan, luga nan a forma gruponan, a mi mes a forma parti di un stuurgroep y nos a bolbe cuminsa anota riba papel pa traha rapport y mi a bisa nan, mi no kier traha rapport, tin hopi rapport traha caba, mi kier wak hechos.”

Den un reunion cu recientemente nan a tene cu prome minister Valdes a trece dilanti un biaha mas cu e Foro di Adulto Mayor den su dos edicion “no a logra nada” pa motibo cu e ta conta cu e lista di spera na SABA ta keda igual.

“E Sra. cu ta dirigi SABA aworaki a bisa cu e por habri 30 luga, pero no tin personal pa traha. Con nos ta maneha un luga asina aki? bo mester tin un vision adelanta pasobra e cantidad di hendenan cu ta bay tin e ayudo special ta bira mas hopi y keto bay a mi ta sinti, cu masha poco ta wordo haci.”

Pa e motibonan aki, Valdes ta keda trece dilanti su preocupacion y vooral na Gobierno “cu algo mester haci pa nos grandinan cu a traha y a forma e pais aki,” el a bisa.

El duna como ehemplo e inmigrantenan cu a yega for di basta tempo pasa, nan a traha cu salario minimo y algun di nan hasta tabatin dos trabou pa mantene nan famia y nan cas “awor cu nan a bira grandi, kico nos ta haci? Pone nan un banda y paga nan un pension cu no ta yega ni na 800 florin pa luna, ki manera di trata hende esey ta?” Valdes ta señala.

Te ainda nan ta sigui traha pa mantene nan mes unda costo di bida ta sigui subi y pa Valdes “esaki no ta husto.”

Den su opinion, e ta sigura cu tur hende hoben mester realisa cu un dia nan tambe lo bira grandi y si e situacion aki no lo wordo drecha na e momentonan aki, “mañan nan lo ta den mesun boto, miho nos cuminsa trata nos hendenan di aworaki aki bon, laga nan tin un bon calidad di bida pa mañan no lo pasa den mesun cos aki.”

Valdes ta sigura cu aunke tin un minister cu ta encarga cu e cartera di Adulto Mayor “a mi no ta sinti cu hopi a wordo haci pa nos grandinan.”

El a trece dilanti un articulo cu a sali publica den un medio local cual tin e siguiente headline: “Gobierno ta mira cu via ‘Ouderenraad’ awor nos grandinan lo haya mas participacion” den e texto publica na october di 2021 tabata indica cu “Den vision di Gobierno di Aruba, Ouderenraad ta importante y e institucion di esaki pronto lo wordo concretisa. Ouderenraad ta e comision di nos grandinan cu lo consisti di personanan cu ya a baha cu pensioen, 60+. E intencion ta pa e Ouderenraad duna Gobierno conseho cu ta na interes di nos grandinan. E comision lo duna conseho na Gobierno sea Gobierno pidi conseho of no.”

Sinembargo, Valdes ta sigura cu esaki nunca a tuma luga “te ainda nos no tin un participacion den decisionnan pa nos grandinan cu ta toca nos directa- of indirectamente. Nan ta lubida cu nan tin mas o menos 30.000 pensionado den un comunidad cu aproximadamente 107.000 habitante lo cual ta un porcentahe halto.”

Mirando cu ayera tabata Dia Internacional di Adulto Mayor y OPPA ta trece e puntonan aki dilanti, pa nan esaki no ta nifica un dia pa celebra “e ta mas bien un reconocemento cu nos ta duna na nos grandinan. Lamentablemente nos organisacion unda miembronan ta paga solamente 10 florin pa luna, mucho espacio no tin pa haci pa nos miembronan. Mare nos tin mas cen pa nos por haci un actividad mas grandi y acapara hopi mas hende.”

Pa loke ta trata e actividad di ayera dirigi riba esnan cu mas di 80 aña, Valdes a bisa cu ta esnan cu segun añanan ta pasa, nan tin mas necesidad, por ehemplo den cuido.

Awor cu eleccion di un gobierno nobo lo tuma luga, Valdes a sigura cu “nos ta bay wak atrobe cu tur partido politico ta cuminsa busca mi pa papia di esey, dicon? No ta awor tin hende grandi na Aruba.”

Su deseo tpa e dia aki ta pa hendenan bira mas consciente, trata e hendenan grandi mas bunita pa asina nan por tin un final contento “pasobra nan ta merece esey,” el a finalisa.