Presidente di Colombia, Iván Duque, a presenta ayera na Asamblea General di Organisacion di Nacionnan Uni (ONU) e dossier riba e denuncia di e presencia di FARC na Venezuela.
E documento di 228 pagina, skirbi na Spaño y Ingles, ta duna cuenta di e menasa contra paz regional pa cuenta di gruponan arma ilegal presente na frontera y cu supuesto complicidad di e presidente Venezolano, Nicolas Maduro.
E texto, cu a entrega na António Guterres, Secretario General di ONU, ta duna cuenta di ki manera FARC y ELN ta move cu normalidad total na Venezuela, specificamente na Zulia, Tachira y Apure. Tambe eynan ta indica cu Henry Castellanos Garzón, alias ‘Romaña’ – ademas di alias el ‘Zarco’, alias ‘Gentil Duarte’, alias ‘El Paisa’ y alias ‘John 40’ – ta move den zona fronteriso.
E informe ta revela detayenan di con e ruta di narcotrafico ta funciona y ta haci referencia na varios reunion clandestino cu supuestamente e disidencia di FARC a realisa na Venezuela.
Na un foro na New York, e Presidente di Colombia a sigura cu su Administracion, ‘a diferencia di esun anterior’, ta busca haya paz na e pais basa riba legalidad y cu medidanan duro contra agrupacionnan criminal.
Duque a participa den un combersacion hunto cu Howard Buffett, yiu homber di inversionista multimiyonario Warren Buffet, riba e papel cu e capital priva por hunga den consolidacion di paz na Colombia, den cual e empresario lo inverti durante e proximo 5 aña di 150 pa 200 miyones di dollar den proyectonan social.
