(AP) – Italia a marca e di 5 aniversario riba dialuna di e colapso di Genoa su brug Morandi cu un minuut di silencio y exigencianan di husticia pa e 43 persona cu a fayece den loke autoridadnan a bisa ta un ehempel di negligencia causa pa codicia.
Minister di Infrastructura Salvini a conta e familiarnan di e victimanan, residentenan local y autoridadnan na e conmemoracion na Genoa cu e hendenan cu a cay no tabata victima di un inundacion ni tampoco desaster natural. “Nan tabata victima di codicia y hendenan cu no kier a haci nan trabao.”
Un seccion grandi di e brug Morandi a kibra durante un tormenta di yobida dia 14 di augustus, ora cu e careteranan tabata yen durante Italia su vakantie mas grandi, mandandonan autonan abao den e riu seco bao e brug.
58 persona a bay huicio aña pasa, acusa di homicidio causa pa negligencia y otro acusacionnan. Esaki ta inclui ex ehecutivonan y expertonan tecnico di e compania cu ta maneha varios brug y caretera di Italia ademas di ex oficialnan di Salvini su ministerio.
E fiscalnan ta alega cu e acusadonan tabata sa cu e brug, cual a ser construi den aña 1960, ta den riesgo di colapsa y cu no a haci e trabao manera mester ta pa spaar placa. E brug su diseñador a recomenda mantencion regular riba e cement pa kita oxidacion, specialmente a causa di e aire salo di e lama cu ta cerca.
Salvini a bisa e audiencia cu a reuni bao e parti nobo cu a keda inaugura den aña 2020 pa reemplasa Morandi, cu el a lesa documentonan di e huicio. Aunke e no kier adelanta su mes na e veredicto, el a argumenta cu e evidencia di codicia y falta di cautela tabata sumamente cla.
