(AP)—E ehercito Israeli a ordena un evacuacion en masa di Palestinonan for di un gran parti di Khan Younis ayera, un señal cu tropanan lo posiblemente lansa un asalto nobo riba e segundo ciudad mas grandi na Gaza.

E orden a sugeri cu Khan Younis lo ta e obhetivo mas recien di e incursionnan di Israel den partinan di Gaza cu el a invadi prome caba den e guera, mientras e ta persigui militante di Hamas. Un gran parti di Khan Younis a ser destrui den un asalto largo na comienso di aña, pero cantidadnan grandi di Palestinonan a move bay back pa scapa un otro ofensiva Israeli den e ciudad di Rafah.

E orden a bin mientras Israel a libera e director di e hospital principal na Gaza despues di a mantene den costudia pa shete luna sin carga of huicio tocante acusacionnan cu a facilidad a ser usa como un centro di comando pa Hamas, cual e y otro oficialnan di salud Palestino a nenga. El a bisa cu e y otro detenidonan a ser manteni den costudia bao condicionnan terible y a ser tortura.

E decision pa libera Mohammed Abu Selmia a causa curiosidad tocante e declaracionnan di Israel relaciona na e Shifa Hospital, cual forsanan Israeli a incursiona dos biaha desde e comienso di e guera cu Hamas.

Su liberacion a causa un alboroto den e spectrum politico di Israel. E oficina di prome minister Benjamin Netanyahu a yam’e un “eror grave.” Ministernan di gobierno y lidernan den oposicion a expresa rabia y a insisti cu Abu Selmia tabata hungando un rol den Hamas su supuesto uso di e hospital—aunke servicionan di seguridad Israel rara bes ta libera prizoneronan unilateralmente si nan ta sospecha di conexionnan militar.

Evacuacion di Kahn Younis
 E orden di evacuacion ayera a cubri e mita este di Khan Younis y un gran parti di e skina sureño di Gaza. Na comienso di dia, e ehercito a bisa cu a tira un cantidad di raket for di Khan Younis.

E orden a sugeri cu un asalto nobo den e ciudad tabata inminente. Forsanan Israeli a bringa pa varios siman na Kahn Younis na comienso di aña y a retira, bisando cu el a destrui e batayonnan di Hamas. Pero den otro luganan unda e ehercito a haci declaracionnan similar, incursionnan renoba a enfatisa e capacidadnan di Hamas.

Siman pasa, e ehercito a ordena un evacuacion for di e districto Shijaiyah panort di Gaza, y bringamento intensivo a sigui. Netanyahu a bisa ayera cu e ehercito tabata “haciendo progreso pa trece un fin na e fase di e destruccion di e ehercito di teror di Hamas.” Pero el a bisa cu forsanan lo sigui “dirigi riba loke ta resta di nan bayendo dilanti.”

Mas bringamento den e area di Khan Younis por sigui daña e acceso di Palestinonan na awa potable. Inclui den e zona di evacuacion ta un liña di awa cu Israel a instala despues di a ricibi critica tocante e cortamento di awa na comienso di guera.

Tambe den e zona ta e area rondonando e crusada di Kerem Shalom, un crusada clave pa ayudo drenta e parti sur di Gaza, y un ruta di ayudo dentro di e teritorio cu Israel a bisa e lo proteha. Mayoria di e poblacion di 2.3 miyon hende di Gaza a huy for di nan cas, cu hopi kedando desplasa varios biaha. Restriccionnan Israeli, bringamento y e kiebre di orden publico a stroba e entregamento di ayudo humanitario, cual a acelera hamber y a causa preocupacionnan di hambruna.

Secretario-general di e Organisacion di Nacionnan Uni (ONU), Antonio Guterres, a bisa cu e orden di evacuacion nobo “ta djis mustra atrobe cu ningun luga ta safe na Gaza” pa ciudadanonan Palestino. “E ta un otro parada den e movemento circular cu e poblacion di Gaza mester pasa den dje dia pa dia,” el a bisa den un declaracion yamando pa un alto el fuego.