Ayera, forsanan Israeli a dal varios ‘target’ den strip di Gaza, incluyendo e oficina di e lider supremo di Hamas, como contesta na un atake sorpresa cu racket for di teritorio Palestino, mientras e militarnan a reforsa nan tropa y sistema di defensa den anticipacion di un ronda nobo di pelea cu e grupo militante Islamico.

Israel a habri shelter di bom publico den mayoria di ciudad mayor, y autoridadnan di defensa civil a cancela eventonan deportivo y transporte publico den sur di Israel. Ehercito Israeli a bisa cu sirena di ‘air raid’ a wordo scucha a traves di sur Israel anochi, y media Israeli a reporta sikiera 10 racket dispara den e pais, pero no a duna mas detaye.

“Israel ta respondiendo cu forsa na e agresion aki”, prome minister Israeli, Benyamin Netanyahu a bisa. “Nos lo haci locual tin mester pa defende nos pueblo y nos estado.”

Laat dialuna, Hamas a anuncia cu a logra acorda un paro na e agresion cu ayudo di mediadornan Egipcio. Pero poco despues, mas racket por a wordo scucha na Gaza. Prome cu e atake aereo Israeli, e liderazgo di Hamas a sconde.

Durante e atake, a destrui e oficina di lider di Hamas, Ismail Haniyeh. Militar Israeli a confirma e bombardeo, bisando cu e edificio ‘tabata sirbi como un oficina pa hopi reunion militar’. Mas trempan a destrui un edificio cu Israel a bisa tabata sirbi como e sede di inteligencia militar di Hamas.

E agresion ta yega durante un situacion delicado tanto pa Netanyahu como Hamas.

Netanyahu ta buscando reeleccion, y apenas dos siman prome cu e voto dia 9 di april proximo, ta enfrentando critica fuerte cu e ta mucho suave riba Hamas. Na Washington pa celebra e reconocemento di e control Israeli di Golan Heights, Netanyahu a wordo forsa pa haci su biahe mas cortico, bou presion di retaliacion contra Hamas.

Di su banda, Haniyeh a adverti Israel contra retaliacion, bisando cu e Palestinonan ‘no lo rindi’ y cu su faccionnan militar ‘lo desalenta e enemigo si e exede e liñanan cora’.

Hamas ta teniendo protestanan semanal a lo largo di e frontera Israeli durante e ultimo aña, cu speransa pa alivia e blokeo, pero e demonstracionnan, den cual como 190 persona a perde nan bida pa tiramento Israeli, a haci tiki pa mehora e condicionnan.